Արսեն Թորոսյանը արձագանքեց, և ընդամենը տասը օր անց Ալվարդն արդեն պրոթեզ ունեցավ
«Արցախյան պատերազմի տարիներին վիրավորում ստացած Ալվարդ անունով երիտասարդ կինը, ով հինգ տարեկանում կորցրել էր ոտքը՝ ծնկից ներքև, վերջապես ստացել է նոր պրոթեզ»:
Այս մասին ֆեյսբուքյան իր էջում գրել է օգտատեր Իրինա Գասպարյանը և շնորհակալություն հայտնել Աշխատանքի և սոցիալական հարցերի նախարար Արսեն Թորոսյանին:
«Ալվարդը ծնվել է Արցախի Հանրապետության Մարտակերտի շրջանի Կոճողուտ գյուղում։ Հինգ տարեկանում՝ Արցախյան պատերազմի տարիներին, Ստեփանակերտի ռմբակոծության հետևանքով նա կորցրել է ոտքը՝ ծնկից ներքև։ Նույն օրը նաև կորցրել է ընտանիքի երկու անփոխարինելի անդամներին՝ 14-ամյա եղբորը և պապիկին։
2023 թվականից հետո Ալվարդի ոտքի պրոթեզի հարցով դիմեցինք գրեթե բոլոր կառույցներին, սակայն քաղաքացիության թղթային խնդիրները երկարացնում էին գործընթացը, և գնալով անհնարին էր թվում Ալվարդի ոտքի պրոթեզ ստանալը։
Օրեր առաջ, վստահ լինելով, որ որևէ բան չի փոխվի Ալվարդի կյանքում, Արսեն Թորոսյանի ֆեյսբուքյան էջում տեղադրված տեսանյութերից մեկի տակ գրեցի մեկնաբանություն՝ ներկայացնելով Ալվարդի խնդիրը։ Ի զարմանս ինձ՝ պարոն Արսեն Թորոսյանը արձագանքեց, և ընդամենը տասը օր անց Ալվարդն արդեն նոր, շատ լավ պրոթեզ ունեցավ։
Անչափ շնորհակալ ենք բոլորին՝ Ալվարդի կյանքը երջանկացնելու համար»,-գրել է օգտատերը:
