Աշխատանքի և բարեկեցության նախարար Արսեն Թորոսյանը կառավարության նիստում առաջարկել է, որ պետական կառավարման համակարգը լեզուներ սովորի, հատկապես՝ անգլերեն։
Արձագանքելով՝ վարչապետ Նիկոլ Փաշինյանը նշել է. «Ինչո՞ւ մենակ անգլերենի։ Ես Կառավարման ակադեմիայում ռուսերենի եմ գնում։ Մեկը կարող է ճապոներենի գնալ, երրորդը՝ չինարենի, իսպաներենի, գերմաներենի»։
Ըստ վարչապետի՝ ՀՀ-ում երկար ժամանակ սովորելու ամոթ է եղել. «Սովորելու ամոթ է, որովհետև եթե սովորում ես՝ ուրեմն չգիտես, եթե չգիտես՝ ուրեմն տգետ է, ուրեմն՝ տգետ լինելն ամոթ է։ Դրա համար պետք է կանգնել ծառի տակ այնպես, ոնց որ ամեն ինչ գիտես»,— ասել է նա։
Վարչապետն առաջարկել է առերեսվել դրա հետ. «ՀՀ իշխող էլիտաներին պետք է եղել, որ հնարավորինս շատ տգետ լինի երկրում, որ հնարավորինս հեշտ կառավարեն քրեական ենթամշակույթի միջոցով։ Ու քրեական ենթամշակույթի միջոցով հատկապես տղաների շրջանում սովորելը դարձել է ամոթ»,— ասել է նա՝ հավելելով. «Հիմա տղաները դրա համար ՀՀ-ում կորցնում են իրենց դիրքերը բոլոր տեղերում»։
Ըստ նրա. «Այո, զրո դասարանում ենք մենք, և պետք է փոխվել։ Գնալ առաջ և ուրիշ ճանապարհ, բացի կրթությունը, չկա»։
