Նախորդ տարիների ընթացքում մենք մի շարք հաջողություններ ենք ունեցել, մենք ֆանտաստիկ հաջողություններ ենք ունեցել նախորդ տարիների ընթացքում: Այդ մասին Ազգային ժողովի՝ օգոստոսի 4-ի ելույթի ժամանակ հայտարարեց ԱԺ նախագահի տեղակալի թեկնածու Վահագն Ալեքսանյանը՝ նշելով, որ այդ հաջողություններից են թոշակների բարձացումը, հարյուրավոր դպրոցների և ճանապարհների կառուցումը, նոր զինատեսակների ձեռքբերումը, ՀՀ-ում ԱԹՍ-ների արտադրության մեկնարկը, նաև սահմանին հակառակորդի կրակոցից զոհ չի եղել:
«8-րդ գումարման խորհրդարանը ՀՀ անկախությունից ի վեր պատմության ընթացքում ամենակարևոր խորհրդարանն է եղել: 8-րդ գումարման խորհրդարանի աշխատանքների ընթացքում է, որ վերջնական լուծում է տրվել մի կարևոր հարցի՝ ո՞րն է մեր հայրենիքը: 8-րդ գումարման խորհրդարանի աշխատանքների ընթացքում է, որ տեղի է ունեցել առաջին լուրջ քաղաքական բանավեճը, և առաջին լուրջ քաղաքական հակամարտությունը: Մինչև դա տեղի ունեցածի մասին մեր թիմակիցները, նաև վարչապետը շատ հաճախ ասում են՝ մենք բոլորս եղել ենք Դաշնակցության տարբեր թևերի ներկայացուցվիչներ»,- ասաց նա:
Անդրադառնալով 9-րդ գումարման խորհրդարանին՝ Վահագն Ալեքսանյանն ասաց, որ այս խորհրդարանում մի կարևոր բան կարող են լուծել: Նա նկատեց՝ բանավեճ կա կողմերի միջև, այն մնալու է, բայց արձանագրեց, որ դա ընթանում է մեղմ տոնայնության մեջ, այլ բառամթերքով, և որ դրա համար ուրախ է, ապա դիմելով խորհրդարանականներին՝ ասաց՝ եկեք այդ ոճը պահենք:
«Եթե այս ոճը պահենք, մենք խորհրդարանի վարկանիշի առումով շատ լուրջ աճ կգրանցենք մեր քաղաքացիների շրջանում»,- ասաց նա:
