Եթե այս ԱԺ-ն լեգիտիմ չէ, դահլիճում ի՞նչ գործ ունեք. Տարոն Չախոյանը՝ ընդդիմությանը
Ժամեր շարունակ ականատես ենք լինում, թե ինչպես երկնքից իջած թևերը կտրած հրեշտակի նման ընդդիմադիր գործիչները փորձում են այս ամբիոնից, այս դահլիճից ժողովրդին համոզել, որ այս ԱԺ-ն լեգիտիմ չէ: Եթե այս ԱԺ-ն լեգիտիմ չէ, դահլիճում ի՞նչ գործ ունեք: Եթե ընտրությունները կեղծվել են, ձայները փոշիացվել են, ձայները գողացվել են, եթե, ըստ ձեր ներկայացրածի, այս իշխանությունը լեգիտիմ չէ, մինչև այսօր ինչո՞ւ փողոց դուրս չեք եկել: Դուրս գայիք փողոց, հեղափոխություն անեիք:
Այդ մասին Ազգային ժողովի՝ օգոսոտի 2-ի նիստին ասաց «Քաղաքացիական պայմանագիր» խմբակցության պատգամավոր Տարոն Չախոյանը՝ խորհուրդ տալով ընդդիմադիրներին կեղծ թեզեր չտարածել, թե ինչու են վերցրել մանդատները:
«Մանդատները վերցրել եք թե չէ՝ դա ձեր գործն է, բայց կեղծ թեզերը մի՛ փորձեք մատուցել հանրությանը՝ «մանդատները վերցրել ենք, որ մեր եկեղեցին փրկենք», «մանդատները վերցրել ենք, որ հայ մնանք»: Բա դրանից առաջ էլ ասում էիք՝ գալիս ենք ընտրությունները հաղթենք, դառնանք վարչապետ, որ Հայաստանը չփլուզվի, որ եկեղեցիները չփլուզվեն: Բա ընտրությունները պարտվելուց հետո Հայաստանն ինչո՞ւ չփլուզվեց, 300 հազար ադրբեջանցիներն ո՞ւր են, հարգելինե՛րս»,- ասաց նա։
Անդրադառնալով ընդդիմադիրների դժգոհությանը, թե ինչու Գարգեգին Բ-ն չի եկել խորհրդարան, Չախոյանը նկատեց. «Ո՞վ է ձեր Վեհափառը, Կտրիճ Ներսիսյա՞նը: Կտրիճ Ներսիսյանին կգնաք ու կփնտրեք այնտեղ, որտեղ ինքը կա: Այն Կտրիճ Ներսիսյանին փնտրեք իր ապօրինի զավակների մոտ: Նա կուսակրոնության ուխտը խախտած Կտրիճ Ներսիսյանն է»:
Տարոն Չախոյանի այս ելույթին տեղից արձագանքեցին ընդդիմադիրները, Ազգային ժողովում իրարանցում սկսվեց:
