ԱՄՆ նախագահ Դոնալդ Թրամփը Հարավային Դակոտա նահանգի Ռաշմոր լեռան մոտ ելույթ է ունեցել Միացյալ Նահանգների անկախության 250-ամյակին նվիրված հանդիսավոր միջոցառման ժամանակ։
Խոսքի զգալի մասը նա նվիրել է ամերիկյան ինքնության, մշակույթի և ներքին քաղաքականության հարցերին, ինչպես նաև կտրուկ քննադատել է կոմունիզմը՝ այն անվանելով երկրի գլխավոր սպառնալիքներից մեկը։ Թրամփի խոսքով՝ ԱՄՆ-ում նկատվում է «կոմունիստական սպառնալիքի վերածնունդ», այդ թվում՝ որոշ նոր ներգաղթյալների կողմից, որոնք, ըստ Թրամփի՝ «կիսում են ամերիկյան կենսակերպին և մեծ հաջողությանը հակասող գաղափարներ»։ Նա նաև կոմունիզմն անվանել է «Սահմանադրության թշնամի», «1776 թվականի հուլիսի 4-ի թշնամի» և ընդհանրապես՝ «Ամերիկայի թշնամի»։
Թրամփը նաև հայտարարել է, որ ամերիկյան ազատությունը երկուս ու կես դար պահպանվել է ոչ միայն Սահմանադրության, այլև ժողովրդի մշակույթի և բնավորության շնորհիվ։ Նրա խոսքով՝ վերջին տարիներին փորձեր են արվել «փոխել այս բացառիկ բնավորությունը, կտրել ամերիկացիներին իրենց սեփական պատմությունից» և զրկել երկիրն իր ինքնությունից։
«Մենք մեր երկրին կվերադարձնենք իր ինքնությունը։ Ամենից առաջ ամերիկացիները սիրում են ազատությունը»,- ընդգծել է Թրամփը՝ հավելելով, որ ամերիկացի լինելու համար պարտադիր չէ ծնվել ԱՄՆ-ում, «սակայն անհրաժեշտ է սիրել երկիրը և այն, ինչ կառուցվել է»։
Անդրադառնալով ԱՄՆ անկախությանը՝ Սպիտակ տան ղեկավարն ասել է. «250 տարվա պատմությամբ Ամերիկան աշխարհի ամենահին հանրապետությունն է։ Մենք աշխարհի ամենաազատ ժողովուրդն ենք։ Մենք ունենք աշխարհի ամենաարդար և ամենակայուն Սահմանադրությունը։ Մենք աշխարհի ամենաուժեղ և ամենահզոր երկիրն ենք։ Եվ Աստծու շնորհիվ Ամերիկայի Միացյալ Նահանգները մարդկության պատմության ընթացքում երբևէ գոյություն ունեցած ամենահաջողակ, ամենաշատ ձեռքբերումներ ունեցած և ամենաբացառիկ պետությունն է»։
