Ինչպիսին ընդդիմությունն է, այնպիսին էլ նրանց նկատմամբ խոսույթն է. Վահագն Ալեքսանյան
Կարծում եմ՝ վարչապետի առաջարկած գաղափարը Ռոբերտ Քոչարյանին բխում է հենց իր արտասանածից: Պարոն Քոչարյանը էմպիրիկ եղանակով թող փորձի ապացուցել իր ասածների ճշմարտացիությունը, թեև ես նույնպես համակարծիք եմ վարչապետի հետ: Այս մասին խորհրդարանում լրագրողների հետ ճեպազրույցում հայտարարեց ՔՊ խմբակցության պատգամավոր Վահագն Ալեքսանյանը:
Ալեքսանյանի խոսքով՝ ինչպիսին ընդդիմությունն է, այնպիսին էլ նրանց նկատմամբ խոսույթն է:
«Մենք շատ կուզենայինք, որ մեր ընդդիմադիրները, օրինակ՝ լինեին ինտելեկտուալ, լինեին կառուցողական, նորմալ քաղաքական դիսկուրսի մեջ»,- նկատեց նա:
Լրագրողներից մեկի դիտարկմանը, թե Քոչարյանն ասել է, որ «պեռաշկի» ու սուջուխ ուտելով անլրջացվում է ընտրական գործընթացը, Ալեքսանյանը պատասխանեց՝ Քոչարյանը կարող է իրենց կերած «պեռաշկիների ու կուկուռուզների» մասին խոսելու փոխարեն խոսի 200 միլիոն դոլարի մասին, որը, ըստ դատախազության մեղադրանքի, ինքն է կերել:
«Կարա մեր կերած պեռաշկու մասին խոսի, կարա իր կերած 200 միլիոնի մասին խոսի ու դրանով իսկ բավականաչափ լրջացնի քաղաքական դիսկուրսը: 200 միլիոն դոլարը Հայաստանի ամենաբարձր վարձատրվող պետական պաշտոնյայի մի 5000 տարվա աշխատավարձն է, 200 միլիոն դոլարը մի 100 դպրոց է ՀՀ տարբեր գյուղերում»,- ասաց պատգամավորը:
Ինչ վերաբերում է եթերում ուտելիքներ ուտելուն, դրանք ցուցադրելուն, պատգամավորը նկատեց՝ մարդը պետք է սնվի:
«Առհասարակ, ոչ մի վատ բան չեմ տեսնում սիբեխով աղցան ուտելու մեջ, բայց մարդը (Ռոբերտ Քոչարյան - խմբ.), որը նման մեղադրանք էր հնչեցնում, ինքն ինչով էր զբաղվում: Էդ մարդը հանրայնացնում էր էն, որ ինքը գնացել է Տանզանիա, միլիոններ է ծախսել, վայրի բնության մեջ առյուծ էր սպանել, նստել էր սատկած առյուծի վրա, ու ինքը այդ նկարներն էր հանրայնացնում: Դա է տարբերությունը»,- նկատեց Ալեքսանյանը:
Հարցին՝ որն է վարչապետի կողմից ուտելիքի տեսարանները հանրայնացնելու նպատակը, պատգամավորը ասաց՝ խնդիր չի տեսնում դա հանրայնացնելու մեջ:
«Ես չեմ հասկանում՝ ինչու եք դրանում խնդիր տեսնում: Հայ հանրությունը ինչ ակնկալիք ունի վարչապետից, նա այդ ակնկալիքները ձևակերպում է գնալով քվեարկության ու այդ քվեարկությունը ամրապնդելով: ՀՀ վարչապետը մարդ է, որը ժողովրդի հետ ուղիղ և անմիջական կապի մեջ է»,- ասաց նա:
