Դավիթ Խուդաթյանը հետևել է Սյունիքում պետբյուջեի միջոցներով իրականացվող ճանապարհաշինական աշխատանքների ընթացքին
ՀՀ ՏԿԵ նախարար Դավիթ Խուդաթյանը երկօրյա աշխատանքային այցով գտնվել է Սյունիքի մարզում։ Այս մասին հայտնում է նախարարությունը:
Փոխվարչապետ Տիգրան Խաչատրյանի գրասենյակի ղեկավար Արման Ադիլխանյանի, Սյունիքի մարզպետ Ռոբերտ Ղուկասյանի, «Ճանապարհային դեպարտամենտ» հիմնադրամի գործադիր տնօրեն Արկադի Չերչինյանի, ոլորտային պատասխանատուների ու համայնքապետերի հետ նախարարը երկու օր շարունակ հետևել է պետական բյուջեի միջոցներով իրականացվող ճանապարհաշինական աշխատանքների ընթացքին։
Նախ հետևել են Հյուսիս-Հարավի Տրանշ-4-ի Քաջարան-Ագարակ 32 կմ երկարությամբ ճանապարհահատվածի կառուցման աշխատանքներին։ Այցելել են Քաջարան-Ագարակ հատվածի առաջին թունել և ներկա գտնվել թունելի հորատման վերջնական աշխատանքներին։
Այս ճանապարհահատվածի կառուցման արժեքն ավելի քան 214 մլն դոլար է։ Այն ներառում է երկու թունել և 17 կամուրջ։ Կամուրջների հենապատերի կառուցման աշխատանքները ևս մեծ թափով առաջ են ընթանում։
Այնուհետև այցելել են Նռնաձոր, որտեղ ամբողջությամբ նոր ճանապարհ է կառուցվում՝ մոտ 10.1 կմ երկարությամբ։ Այս նորակառույց ճանապարհով Նռնաձորը կկապվի Մեղրիին և Սյունիքի մարզը կունենա ամբողջությամբ նոր ճանապարհ։ Տեղում շինարարին և մյուս պատասխանատուներին նախարարը հանձնարարել է արագացնել ճանապարհի կառուցումը և հետևել օրացուցային գրաֆիկին։ Ծրագրի ընդհանուր արժեքը 2 մլրդ 560 մլն ՀՀ դրամ է։
Պաշտոնյաներն այցելել և դիտարկել են նաև Կապան-Ծավ ավտոճանապարհի երկու հատվածների նորոգման աշխատանքները։
Աշխատանքային այցի երկրորդ օրն այց է կատարվել Խոտ-Որոտան նորակառույց ճանապարհ, որտեղ իրականացվել են վերակառուցման աշխատանքներ։
Այցելել են նաև Որոտան բնակավայր, զրուցել բնակիչների հետ, լսել նրանց խնդիրները։
Հաջորդ կանգառը Սյունիքի մարզի Վաղատին և Աշոտավան բնակավայրերն են եղել, որտեղ իրականացվել են ճանապարհի հիմնանորոգման աշխատանքներ։
Վաղատինում պետական բյուջեի միջոցներով հիմնանորոգվել է շուրջ 1.7 կմ, իսկ Աշոտավանում՝ 10 կմ երկարությամբ ճանապարհ։ Երկու ճանապարհների ասֆալտապատումն էլ ավարտվել է, ընթացքի մեջ են ճանապարհների կահավորման աշխատանքները։
Շինարարական բոլոր օբյեկտներում նախարարը հանձնարարել է անշեղորեն հետևել կատարվող աշխատանքների որակին և ժամանակացույցին։
Այցի ավարտին Սիսիան քաղաքում և Ույծ գյուղում Խուդաթյանը ծանոթացել է սուբվենցիոն աշխատանքների ընթացքին, քննարկել համայնքում կառավարություն ֊ համայնք համաֆինանսավորմամբ իրականացվող ծրագրերի ընթացքը, առաջիկա անելիքները։
