Սահմանամերձ բնակավայրերում 2242 նոր սեփական տուն է կառուցվել, 172-ն արդեն ունեն ավարտական ակտ. ԱՍՀ նախարար
16 մլն դրամով բնակարանների կառուցման ծրագրի շրջանակում բազմաթիվ ընտանիքներ կառուցել և շարունակում են կառուցել իրենց սեփական տունը, ընդ որում՝ ծրագրի շրջանակում Տավուշի մարզի Բաղանիս, Բերքաբեր, Կիրանց և Ոսկեպար բնակավայրերում 16 մլն դրամի փոխարեն մենք ֆինանսավորել ենք 21 մլն դրամի չափով, եթե ծրագրին դիմելու օրվա դրությամբ նախորդ մեկ տարվա ընթացքում քաղաքացիներն այդ բնակավայրում արդեն իսկ ունեցել են հաշվառում: Այդ մասին Ազգային ժողովի՝ նոյեմբերի 12-ի նիստին ասաց ԱՍՀ նախարար Արսեն Թորոսյանը:
«Երեկվա դրությամբ արդեն հաստատվել է 2299 շահառուի հայտ, որից 2242-ն արդեն վարկավորվել են, ինչը նշանակում է, որ տներն սկսել են կառուցել: Պատկերացրեք՝ 2242 նոր սեփական տուն է կառուցվել սահմանամերձ բնակավայրերում, դրանցից 172-ն արդեն նույնիսկ ունեն վերջնական ավարտական ակտ, այսինքն՝ ամբողջությամբ հանձնվել են շահագործման»,- ասաց նա:
ՀՀ-ում անկախությունից հետո նման մեկ այլ ծրագիր նախարարը չհիշեց, որ նույնքան մասշտաբային լիներ, իրականացնողն էլ լինեին քաղաքացիները. վերջիններս են որոշել՝ որտեղ կառուցեն տունը, ինչ տեսակի տուն կառուցեն, ինչ հարմարություններով:
«Գեղարքունիքում 108 տուն է կառուցվել, Արարատում՝ 145, Սյունիքում՝ 225, Վայոց ձորում՝ 306, Տավուշում՝ որպես չեմպիոն այս ծրագրի՝ 1515»,- ասաց նախարարը և հավելեց՝ հիմա մտածում են ծրագիրը վերաբացելու հնարավորության մասին:
