Լիտվայի նախագահը դատապարտել է ՌԴ ինքնաթիռների կողմից Լիտվայի օդային տարածքի խախտումը

Հոկտեմբերի 23-ին Լիտվայի ռազմաօդային ուժերը սահմանի խախտում են հայտնաբերել Կիբարտայի մոտակայքում։ Ռուսական Սու-30 ինքնաթիռը և Իլ-78 լիցքավորող ինքնաթիռը, որոնք, հնարավոր է, Կալինինգրադի մարզում վառելիքով լիցքավորման վարժանքներ էին անցկացնում, մոտ 700 մետր մտել են Լիտվայի տարածք և մոտ 18 վայրկյան այնտեղ մնալուց հետո հեռացել են։ Այդ մասին հայտնել է Լիտվայի զինված ուժերի մամուլի ծառայությունը։

Իրադարձությանն ի պատասխան, խախտման վայր է բարձրացվել իսպանական ռազմաօդային ուժերի երկու Eurofighter Typhoon ինքնաթիռ, որոնք ՆԱՏՕ-ի օդային պարեկային առաքելություն են իրականացրել՝ գրել է DW-ն։

Լիտվայի նախագահ Գիտանաս Նաուսեդան միջադեպը անվանել է «միջազգային իրավունքի և տարածքային ամբողջականության կոպիտ խախտում»։

Ռուսաստանի պաշտպանության նախարարությունը հերքել է մեկ ուրիշ երկրի տարածք ներխուժելու մեղադրանքը։ ՊՆ-ը Telegram-ում գրել է. «Հոկտեմբերի 23-ին ռուսական Սու-30 կործանիչները պլանային ուսումնական թռիչքներ են իրականացրել Կալինինգրադի մարզի տարածքում, ինքնաթիռները չեն շեղվել իրենց թռիչքի երթուղուց և չեն խախտել այլ պետությունների սահմանները, ինչը հաստատվել է օբյեկտիվ վերահսկողության միջոցներով»։