Չկա ավելի մեծ այլասերվածություն, քան դաշնակցաբոլշևիկյան դաշինքը. Ռուբեն Ռուբինյան
ԱԺ ամբիոնից ԱԺ նախագահի տեղակալ Ռուբեն Ռուբինյանն անդրադարձավ «Հայաստան» խմբակցության պատգամավոր Գեղամ Մանուկյանի ելույթին:
Անդրադառնալով Մանուկյանի մեղադրանքներին, որը իշխանություններին մեղադրում էր «հակադաշնակցական բոլշևիկյան պայքարի ժառանգորդներ» լինելու մեջ, հիշեցրեց՝ Կոմկուսի վառ ներկայացուցիչ Վարդանիկը (Վարդան Ղուկասյան - խմբ.) Գյումրիում ում աջակցությամբ դարձավ քաղաքապետ:
«Հետո էլ մեզ եք մեղադրում այլասերվածություն քարոզելու համար: Չկա ավելի մեծ այլասերվածություն, քան դաշնակցաբոլշևիկյան դաշինքը: Ու պարզ է, որ Վարդանիկի նման մեկը պիտի ծնվեր այլ այլասրերված խաչաձևումից:
Պարոն Մանուկյանը չի գնահատում նաև իմ բարությունը: Երեկ խոստացավ իր անունը փոխել, եթե ես ապացուցեմ, որ եղել է հայտարարություն երեք ավանդական կուսակցությունների, այդ թվում՝ Դաշնակցության, որը դեմ էր անկախությանը, ու չնայած ես իրեն կոչ արեցի չփոխել իր անունը, եկել ու ինձ մեղադրում է սուտ խոսելու մեջ»,- հայտարարեց Ռուբինյանը:
Նրա խոսքով՝ Մանուկյանի մեղադրանքները հեշտորեն հերքվում են, քանի որ «փաստերը համառ բան են»:
Ռուբինյանը մեջբերումներ կատարեց Դաշնակցության «Դրոշակ» պաշտոնաթերթից, որում դաշնակցական մի շարք գործիչներ դեմ են հանդես եկել ՀՀ անկախությանը:
Ռուբինյանը նկատեց՝ հիմա մարդկանց մոտ կարող է հարց ծագել՝ ինչու է ինքը խորացել 1988,1989, 1991 թվականների մեջ, պարզաբանեց՝ խորացել է, քանի որ նրանք չեն փոխվել:
«Դուք չեք փոխվել, սիրելինե՛րս, որովհետև 1991-ից հետո գալիս է 2022-ը, և ընդունվում է Դաշնակցության հանրահայտ 004 շրջաբերականը, որտեղ ասվում է. «Անհրաժեշտ է կենտրոնացնել ազգային ողջ ներուժը, որպեսզի Արցախը չդառնա այն գինը, որի հաշվին Ադրբեջանը կարող է ինտեգրվել Ռուսաստանի նախաձեռնելիք հավանական նոր միությանը: Այդ նպատակով անհրաժեշտ է Արցախում և Հայաստանում և Սփյուռքում սկսել նոր պայքար, նկատի ունենալ նաև, որ Ռուսաստանը կարող է Արցախն իր ենթակայությանը ուղղակիորեն ենթարկելու սցենար մշակել և գործադրել այն: Աշխատանք տանել, որպեսզի հավանական միության ձևավորման դեպքում Արցախի ու Հայաստանի ճակատագրերը լուծվեն որպես մեկ ամբողջություն: Նկատի ունեք այդ միության մեջ»,- ԱԺ նախագահի տեղակալը մեջբերեց շրջաբերականից մի հատված ՝ Դաշնակցությանը մեղադրելով Հայաստանի անկախությանը միշտ դեմ լինելու մեջ:
«Հիմա էլ եք դեմ: Կարծում եմ՝ դուք Ստոկհոլմյան սինդրոմի զոհ եք, քանի որ ձեզ մի անգամ բախտ է վիճակվել ղեկավարել Հայաստանը, որը անկախացել է 600 տարի անց, 2 տարի չեք կարողացել պահել անկախությունը, բայց ես ենթադրում եմ դա ձեզ վրա անդրադարձել է՝ դուք ձեզ մեղավոր եք զգացել և ընկել եք Ստոկհոլմյան սինդրոմի մեջ:
Ժողովուրդ ջան, ամոթ չի փոխվելը: Մեր կուսակցությունը, մենք փոխվել ենք, երբ դու հասկանում եք մի ճանապարհը սխալ է, գնում ես մյուս ճանապարհով: Մենք ունենք անկախ հանրապետություն, մեր աչքի լույսը, եկեք իրար հետ փայփայենք դա»,- հայտարարեց Ռուբինյանը:
