ՀՅԴ-ն դեմ է Ադրբեջանի վերնախավի դեմ պատժամիջոցներ սահմանող PEACE Act օրինագծին. Արեգ Դանագուլյան
Ֆեյսբուքում հրապարակված գրառմամբ ֆիզիկոս և պրոֆեսոր Արեգ Դանագուլյանը անդրադարձել է Հայ Յեղափոխական Դաշնակցության (ՀՅԴ) դիրքորոշմանը՝ կապված ԱՄՆ Կոնգրեսում ներկայացված PEACE Act օրինագծի հետ, որը նախատեսում է պատժամիջոցներ Ադրբեջանի ղեկավարության նկատմամբ։
Դանագուլյանի խոսքով՝ եթե իրեն մեկ շաբաթ առաջ ասեին, որ ՀՅԴ-ն կդիմադրի Ալիևի դեմ սանկցիաներին, ինքը չէր հավատա.
«Եթե ինձ մեկ շաբաթ առաջ ասեին որ ՀՅԴ-ն դեմ է հանդիսանալու Ալիևի դեմ սանկցիաներին , ապա ես ուղղակի չէի հավատա: Կասեի` դա համարյա հավասարազոր է դավաճանությանը: Կասեի` դաշնակները բավականաչափ խելք ունեն որ այդպիսի բան չանեն: Բայց ես միամիտ էի:
Ըստ ՀՅԴ-ի բարձրախոս հանդիսացող ANCA կազմակերպության հայտարարությանը` ՀՅԴ-ն դեմ է Ադրբեջանի վերնախավի դեմ պատժամիջոցներ սահմանող PEACE Act օրինագծին: Ինչու՞: Որովհետև օրինագիծը «նեղորեն» ("narrowly"), այսինքն «ընդամենը» զսպում է Ադրբեջանի ագրեսսիան` Հայաստանի դեմ:
Այսինքն այն «ընդամենը» խոչընդոտում է Սյունիքի կորստին:
Այսինքն այն «ընդամենը» պաշտպանում է սահմանին ծառայող 40000+ երիտասարների կյանքերը:
Ընդամենը: Նեղորեն:
Ըստ ՀՅԴ-ի խղճուկ արդարացման, վերը բերված «մանրուքներից» այն կողմ օրինագիծը չի հասցեագրում Ադրբեջանի հանցագործությունները Արցախի և Հայաստանի դեմ: Այո, PEACE Act-ը իսկապես դա չի անում...այն չի լուծում Հայաստանի բոլոր պռոբլեմները: Բայց ինչպե՞ս կարող է դա պատճառ հանդիսանալ սանկցիաներին դեմ լինելու համար:
Նայեք, ես լրիվ կարող եմ հասկանալ մարդկանց վերապահումները` օգոստոսի 8-ի համաձայնագրի կապակցությամբ: Բայց այստեղ խոսքը արդեն գնում է Ալիևի դեմ սանկցիաների մասին: Երբ ՀՅԴ-ն զոհաբերում է ՀՀ անվտանգության հարցը հանուն իր նեղ կուսակցական շահերի, ապա այն հերթական անգամ ինքն իր ձեռքով պատռում է իր «հայրենասիրական» դիմակը: Ու ցույց տալիս թե ինչպիսի խղճուկ աղանդի է վերածվել այս երբեմնի առաջադեմ հեղափոխական կուսակցությունը»,-գրել է Դանագուլյանը
