Բաց ենք ԱՄՆ-ի հետ բանակցությունների համար, բայց չենք հրաժարվի միջուկային զենքից. Կիմ Չեն Ըն
Հյուսիսային Կորեայի առաջնորդ Կիմ Չեն Ընը հայտարարել է, որ եթե ԱՄՆ-ն դադարի պահանջել, որ Հյուսիսային Կորեան հրաժարվի իր միջուկային զենքից, ապա Փհենյանը բաց է ԱՄՆ-ի հետ բանակցությունների համար: «Եթե Միացյալ Նահանգները հրաժարվի ապամիջուկայնացման իր ցնորական գաղափարից, և գիտակցելով իրականությունը, իսկապես ցանկանա խաղաղ գոյակցություն մեզ հետ, ապա չկա որևէ պատճառ, որ մենք չկարողանանք դրան հասնել»,- ասել է Կիմը երկրի խորհրդարանում ունեցած ելույթում:
«Աշխարհն արդեն լավ գիտի, թե ինչ է անում Միացյալ Նահանգներն այն բանից հետո, երբ տվյալ երկրին ստիպում է հրաժարվել միջուկային զենքից: Մենք երբեք չենք հրաժարվի մեր միջուկային զենքից»,- հավելել է Հյուսիսային Կորեայի առաջնորդը:
Կիմ Չեն Ընը նաև հայտարարել է, որ «ոչ մի գործ չի ունենա» Հարավային Կորեայի իշխանությունների հետ: Իսկ ահա ԱՄՆ նախագահ Դոնալդ Թրամփի մասին հյուսիսկորեացի ղեկավարն ասել է, որ «ջերմ հիշողություններ» ունի նրա հետ կապված։ Կիմն ու Թրամփը երեք անգամ հանդիպել են Սպիտակ տանը հանրապետական նախագահի առաջին ժամկետի ընթացքում։
Իր հերթին, Սպիտակ տան ղեկավարն ասել է, որ լավ է ճանաչում Հյուսիսային Կորեայի առաջնորդին և ուրախ կլինի այս տարի հանդիպել նրան:
