Խորհրդարանը քննարկեց առողջապահության որակի բարելավման համար վարկային համաձայնագրով 45,3 մլն եվրոյի վարկ ներգրավելու նախագիծը
Ազգային ժողովում քննարկվեց Հայաստանի Հանրապետության և Ասիական զարգացման բանկի միջև վարկային համաձայնագիրը վավերացնելու մասին նախագիծը, համաձայն որի՝ նախատեսվում է բժշկական համակարգի ծառայությունների որակի ապահովման հիմքեր ստեղծել և այդ նպատակի իրականացման համար 45,3 մլն եվրո արժողությամբ վարկ ներգրավել:
«Առողջապահության որակի բարելավման ծրագիր» վարկային համաձայնագիրը վավերացնելու մասին օրինագիծն Ազգային ժողովի՝ սեպտեմբերի 8-ի նիստին ներկայացրեց ՀՀ առողջապահության նախարարի տեղակալ Լենա Նանուշյանը:
«Այս վարկն արդյունքահենք է, այսինքն՝ սահմանված են որոշակի ցուցանիշներ, թիրախներ յուրաքանչյուր տարվա համար, և եթե հասնենք յուրաքանչյուր թիրախին, և դա վալիդացիա, վերիֆիկացիա անցնի, որ, այո՛, Կառավարությունը տվյալ միջոցառումն իրականացրել է և տվյալ թիրախին հասել է, ապա նոր մասհանում կիրականացնի այդ գումարից»,- ասաց նա:
Ներգրավվող գումարով նախատեսվում է իրականացնել առողջապահական հաստատությունների կառուցում, ոլորտի մարդկային կապիտալի զարգացում, հաշվետվողականության թվայնացում, լիցենազավորման կարգավորում և լրամշակում, էլեկտրոնային առողջապահության գործիքների կիրառման բարելավում, հեռաբժշկության պիլոտային ծրագիր, որը նախատեսում է հասանելի ծառայություններ հեռավոր բնակավայրերի համար։
«Վարկի արժույթը եվրոյով է, վարկի տոկոսադրույքի տեսակը լողացող է: Վարկը սպասարկում է տարին երկու անգամ՝ հունիսի 15 և դեկտեմբերի 15, վարկի ժամկետը 18 տարի է, վարկի արտոնյակ ժամկետը՝ 7 տարի, իսկ մարման ժամկետը՝ 11 տարի: Մասհանման վերջնաժամկետը 2028 թվականի դեկտեմբերի 31-ն է, և նախատեսվում է, որ ծրագիրն այդ ժամկետում պետք է ավարտվի»,- ասաց նա:
