ԼՂ-ից տեղահանված շուրջ 40 հազար անձ ՀՀ քաղաքացիություն է ստացել. ավելի քան 12 հազարն անչափահասներ են.
«Մեր կարողությունների շրջանակում մենք ամենայն թափով սպասարկել ենք Ղարաբաղից տեղահանված բնակչության քաղաքացիության դիմումները»:
Այս մասին ասուլիսի ժամանակ հայտնել է ՆԳ նախարարի տեղակալի պաշտոնակատար Արմեն Ղազարյանը:
«Մինչև այս պահն արդեն իսկ ունենք 40 հազարից ավելի տեղահանված անձինք, որոնք ձեռք են բերել ՀՀ քաղաքացիություն: Նրանցից ավելի քան 12 հազարը անչափահասներ են»,- նշել է նա:
Անդրադառնալով ԼՂ-ից տեղահանվածներին ՀՀ քաղաքացիություն տրամադրելու գործընթացի դանդաղեցման մասին քննադատություններին՝ Արմեն Ղազարյանն ասել է, թե դա նոնսենս է:
ՆԳ նախարարի տեղակալի պաշտոնակատարը տեղեկացրել է, որ բնակարանային ծրագիրը նպաստել է ՀՀ քաղաքացիություն ստանալու համար դիմելիության աճին: Դիմումների թիվն ավելի մեծ է, քան ձեռքբերումների թիվը:
ՆԳՆ միգրացիայի և քաղաքացիության ծառայության պետի պաշտոնակատար Նելլի Դավթյանն էլ հայտնել է՝ ԼՂ-ից տեղահանվածների համար ՀՀ քաղաքացիություն ստանալու կարգը նաև թվայնացվել է, ինչը հեշտացրել է գործընթացը, ապա ներկայացրել է ՀՀ քաղաքացիության շնորհումները կոնկրետ թվերով:
«Այս պահին ունենք Ղարաբաղից տեղահանված անձանց շնորհված 27 հազար 948 ՀՀ քաղաքացիություն, որից 8676-ն այս տարվա ցուցանիշն է»,- նշել է նա:
