Հայկական կաթնամթերքի 4 կազմակերպություններում հիվանդ կենդանիների կաթի օգտագործման հիմնավորում չի հայտնաբերվել. ՍԱՏՄ
ՀՀ սննդամթերքի անվտանգության տեսչական մարմնից հայտնում են, որ ստուգումների տարեկան ծրագրի շրջանակում, ինչպես նաև սպառողներից ստացված բողոքների հիման վրա մշտապես վերահսկողական միջոցառումներ է իրականացնում Հայաստանում արտադրվող կաթնամթերքի բոլոր արտադրամասերում։
«Ստուգումների արդյունքում անհամապատասխանություններ հայտնաբերվելու դեպքում տեսչական մարմնի կողմից կասեցվում է տվյալ արտադրամասի արտադրական գործունեությունը մինչև հայտնաբերված խախտումները վերացնելը, իսկ վտանգավոր խմբաքանակները հանվում են շրջանառությունից և ոչնչացվում։
ՌԴ անասնաբուժական և բուսասանիտարական վերահսկողության դաշնային ծառայության՝ «Ռոսսելխոզնադզորի» և ՍԱՏՄ-ի մասնագետների կողմից հուլիսի 14-21-ը հայկական կաթնամթերքի չորս կազմակերպություններում համատեղ իրականացված վերահսկողության արդյունքերը ռուսական կողմը թեև դեռ չի տրամադրել, սակայն կարող ենք տեղեկացնել, որ այդ արտադրամասերի կողմից հիվանդ կենդանիների կաթի օգտագործման, ինչպես նաև այլ երկրներից ներմուծված հումքի կիրառման հիմնավորումներ ստուգման ընթացքում չեն հայտնաբերվել:
Ըստ ներկայացված փաստաթղթերի՝ արտադրության մեջ օգտագործվող հումքն անցել է լաբորատոր ստուգում և եղել է անվտանգ:
Տեսչական մարմինը հետևողական է, որպեսզի սննդամթերքի արտադրության ողջ շղթան համապատասխանի սննդամթերքի անվտանգության մասին իրավական ակտերով սահմանված պահանջներին»,- նշվում է հաղորդագրության մեջ։
Ավելի վաղ հայտնել էինք,որ «Ռոսսելխոզնադզորը» (Անասնաբուժական և բուսասանիտարական վերահսկողության դաշնային ծառայությունը) հուլիսի 27-ից սահմանափակելու է կաթնամթերքի ներմուծումը Հայաստանից։ Ստուգման ընթացքում գործակալությունը պարզել է, որ տեղական ձեռնարկությունները իբր վարակված անասունների կաթն օգտագործել են Ռուսաստան մատակարարվող մթերքների արտադրության համար։
