Կառավարության՝ հուլիսի 23-ի նիստին ՏԿԵ նախարար Դավիթ Խուդաթյանը ներկայացրեց Արարատ քաղաքի Շահումյան փողոց 20 և 37/1 հասցեներում կառուցապատման ներդրումային ծրագրին հավանություն տալու, ծրագրի իրականացման նպատակով 2 գույք նվիրաբերելուն համաձայնություն տալու մասին որոշման նախագիծը:
«Գույքն առաջարկվում է նվիրաբերել «ՄԼ ՄԱՅՆԻՆԳ» ընկերությանը: Ընկերությունը պարտավորվում է այնտեղ բնակարաններ կառուցել մինչև 2030 թվականը, և 2 բազմաբնակարան շենքերից 48 բնակարան՝ յուրաքանչյուրը մոտ 68 քառակուսի մետր մակերեսով, տրամադրել համայնքին, որպեսզի համայնքը կարողանա բնակարանները տրամադրել այն բնակիչներին, որոնք ժամանակին այդ շենքերում օրդեր են ունեցել:
Բացի դրանից՝ նաև շուրջ 686 քառակուսի մակերեսով հասարակական տարածք է տրամադրվելու էլի համայնքին՝ համայնքային գրադարան կառուցելու համար»,- ասաց նա:
Նիստը վարող փոխվարչապետ Տիգրան Խաչատրյանն արձանագրեց՝ շուտով ավելի ու ավելի շատ քաղաքաշինական ակտիվություն կնկատվի մարզկենտրոններում, որովհետև եկամտային հարկի հիփոթեքային վարկի նկատմամբ գործող Կառավարության աջակցությունը կշարունակի գործել հատկապես այդ քաղաքներում:
«Սա այն դեպքերից է, երբ տեսնում ենք, որ համայնքը և կառուցապատող կազմակերպությունը համագործակցելով՝ կարող են, մի կողմից, իրականացնել նշանակալի քաղաքաշինական ծրագիր, մյուս կողմից՝ նաև համայնքը կարող է այդ հնարավորությունն օգտագործել սոցիալական իր որոշակի պարտավորություններ կատարելու համար»,- ասաց փոխվարչապետը:
ՏԿԵ նախարարը հիշեցրեց, որ մարզերում համանման բնակարանաշինական ներդրումային ծրագրեր իրականացվել են, բայց իրավիճակն այն է, որ երբ Խորհրդային միության ժամանակ այս տարածքները կառուցապատված են եղել, բնակիչները օրդերի դիմաց հրաժարվել են իրենց կառուցապատման իրավունքից, և այդ տարածքում գոյություն ունեցող իրենց գույքը քանդվել է, կառուցվել է կիսակառույց, որը կիսակառույց էլ մնացել է: «Սրա արդյունքում բնակիչները 80-ականներին կորցրած սեփականությունը վերադարձնելու հնարավորություն ունեն, և այդ 48 ընտանիքները այս տեսակ ընտանիքներ են»,- տեղեկացրեց նա:
Ըստ նախարարի՝ Արարատի մարզում բազմաբնակարանների կառուցումը՝ 160 բնակարանները, կթարմացնեն բնակարանային ֆոնդը: Ներդրման ծավալը 5 տարիների համար սահմանված է 3 մլրդ դրամ:
