Դավիթ Խուդաթյանը հետևել է Արմավիրի մարզում ընթացող շինաշխատանքներին.
ՀՀ ՏԿԵ նախարար Դավիթ Խուդաթյանը հուլիսի 21-ին այցելել է «Ճանապարհային դեպարտամենտ» հիմնադրամի գործադիր տնօրեն Արկադի Չերչինյանի, Արմավիրի մարզպետի, համայնքապետերի ուղեկցությամբ Արմավիրի մարզ։ Այս մասին հայտնում է ՏԿԵ նախարարությունը։
Նախարարը նախ դիտարկել է Արմավիրի Բաղրամյան համայքի Վանանդ բնակավայրով անցնող շուրջ 11 կմ հանրապետական նշանակության ավտոճանապարհի հիմնանորոգման աշխատանքների ընթացքը:
Այնուհետև նախարարը մասնակցել է Մեծամոր համայնքի Շենավան բնակավայրի նորակառույց մանկապարտեզի բացմանը։
Ավելի քան երկու տասնամյակ Շենավանը մանկապարտեզ չի ունեցել։ Սակայն 2023 թվականին հաստատված սուբվենցիոն ծրագրով, ավելի քան 280 մլն դրամ արժեքով կառուցվել է 60 երեխայի համար նախատեսված, ամբողջությամբ նոր գույքով կահավորված մանկապարտեզ, որն այսօր իր դռները բացեց փոքրիկների համար:
Նախարարը շնորհավորել է շենավանցիներին մանկապարտեզի բացման կապակցությամբ և ընդգծել, որ Կառավարության «300 դպրոց, 500 մանկապարտեզ ծրագիրը ակտիվ փուլում է և, անհրաժեշտության դեպքում, այն շարունակություն կունենա նաև 2026 թվականից հետո:
Հացիկ բնակավայրում էլ նախարարը հետևել է 110 երեխայի համար կառուցվող երկհարկանի մանկապարտեզի շինարարությանը: Աշխատանքները ակտիվ փուլում էին:
Հացիկ բնակավայրում նախարարը դիտարկել է նաև շուրջ 3,5 կմ հիմնանորոգվող տեղական նշանակության ավտոճանապարհի շինաշխատանքները, որոնք մեկնարկել են այս տարի և նախատեսվում է ավարտել մինչև տարեվերջ:
Խորոնք բնակավայրում նախարար Խուդաթյանը ներկա է գտնվել նոր սպորտային համալիրի կառուցման աշխատանքների հիմնարկեքին: Ծրագրի իրականացման արդյունքում կկառուցվի 100 սանի համար նախատեսված նոր սպորտային համալիր՝ ավելի քան 488 մլն դրամով:
Նախարարը վստահություն է հայտնել, որ շինաշխատանքները կմեկնարկեն և կավարտվեն գրաֆիկին համապատասխան՝ պահպանելով որակի ամենաբարձր չափանիշները:
Նախարար Խուդաթյանն այցելել է նաև Վաղարշապատ և Փարաքար համայնքներում, որտեղ ակտիվորեն իրականացվում են ճանապարհաշինական աշխատանքներ:
Շինարարական բոլոր օբյեկտներում նախարարը տվել է մի շարք հանձնարարականներ և սահմանել ժամկետներ դրանց կատարման համար:
