Ազգային ժողովի «Քաղաքացիական պայմանագիր» խմբակցության պատգամավոր Վահագն Ալեքսանյանը լրագրողների հետ ճեպազրույցում մանրամասներ է ներկայացրել կուսակցության նախընտրական ցուցակի ձևավորման և վարչապետի թեկնածուի ընտրության գործընթացից։
Ալեքսանյանի խոսքով՝ ՔՊ-ն անցնում է ներկուսակցական փրայմերիզի առաջին փուլը, որտեղ ձևավորվել է կուսակցության առաջին 50-յակը։ Նա շեշտեց, որ ցուցակը համապատասխանեցվել է օրենսդրության պահանջներին՝ պահպանելով գենդերային քվոտաները։
«Փաստացի մեր պատվիրակները հիմա ընտրում են դասավորվածությունը... ով ավելի շատ ձայն է հավաքել, ըստ հավաքած ձայների՝ այդ 50 հոգին դասավորվում են այդ 50-ի մեջ»,- նշեց պատգամավորը։
Ալեքսանյանը սա հակադրեց այլ կուսակցությունների գործելաոճին. «Այդտեղ մի հոգի նստած, թուղթը ձեռքին, լսում է, թե այնտեղից ինչ են ասում պագոնավոր ձյաձյաները՝ ԿԳԲ-ի, ու գրում է՝ այս մեկը՝ առաջին, այս մեկը՝ երկրորդ...»։
Հարցին, թե ով է լինելու վարչապետի թեկնածուն, Ալեքսանյանը պատասխանեց. «Իմ ընկալմամբ՝ այստեղ կա բացահայտ ֆավորիտ՝ Նիկոլ Փաշինյանը»։
Անդրադառնալով Սամվել Կարապետյանի հայտարարություններին և նրա հնարավոր արտաքին կապերին՝ Ալեքսանյանը կասկածի տակ դրեց դրանց արդյունավետությունը. «Բրիտանիայում իր բիզնեսները սանկցիաների տակ են, Ֆրանսիայում իր նկատմամբ, եթե չեմ սխալվում, կա մեղադրանք փողերի լվացման գործով... Այդ ո՞ր եվրոպական երկրի մասին եք խոսում, որ ինքը լավ հարաբերություններ ունի»։
Նա նաև հավելեց, որ ընդդիմադիր ուժերը միլիոններ են ծախսում AI-ով (արհեստական բանականություն) գեներացված քոնթենտի և սոցիալական ցանցերի գովազդների վրա, բայց, ըստ նրա, «միևնույն է՝ ընտրությունները պարտվելու են»։
Ալեքսանյանը վստահություն հայտնեց, որ սահմանադրական հանրաքվեի դեպքում ՀՀ քաղաքացիները կողմ կքվեարկեն։
