Ուզում եք՝ ՀՀ-ն դնեք երաշխավորի ձեռքի տակ, հետո երաշխավորն իր ուզած օրն իր շահերի համար մատաղ անի. Հայկ Կոնջորյան
Ուզում եք՝ ՀՀ-ն դնեք երաշխավորի ձեռքի տակ, հետո երաշխավորն իր ուզած օրն իր շահերի համար մատաղ անի. Կոնջորյան
Ուզում եք, որ Հայաստանը տանեք, դնեք երաշխավորի ձեռքի տակ, հետո երաշխավորն իր ուզած օրն իր շահերի համար Հայաստանը տանի, մատաղ անի ու դնի աշխարհաքաղաքական առևտրի զոհասեղանին, և ձեզ էլ վճարի ձեր բաժինը, և ժողովրդի ճակատագիրն էլ որպես մանրադրամ դնեն ձեր ձեռքը: Դա է ձեր ուզածը: Ի՞նչ ազգային արժեք: Այդ մասին Ազգային ժողովի՝ մարտի 26-ի նիստին ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ արձագանքելով խորհրդարանական ընդդիմության քննադատություններին:
«Երբ Ռոբերտ Քոչարյանը չի բացառում, որ Հայաստանը կարող է դառնալ Միութենական պետության մաս, երբ ձեր սիրած Վիտալի Բալասանյանն ասում է՝ այո՛, Հայաստանը պետք է դառնա Միութեանական պետության մաս, երբ ձեր սիրելի Վարդան Ղուկասյանն ասում է՝ Հայաստանը պետք է դառնա Միութենական պետության մաս, դա ի՞նչ է:
Էդ ուզում էիք Հայաստանի գլուխը ուտե՞լ, հետո ուզում եք հայ ժողովրդի զավակներին ուղարկել թնդանոթի միս դառնալո՞ւ ուրիշների սանձազերծած պատերազմում: Ուզում եք, որ հայ ժողովրդի զավակները խաղաղ չապրե՞ն սեփական երկրում: Ուզում եք՝ ուրիշների սանձազերծած պատերազմի սպանդանոցի մեջ մտցնե՞ք հայ ժողովրդի զավակներին: Դրա համա՞ր հանգիստ չունեք, որ այս երկու տարի է՝ կրակոցից զոհ չունենք»,- ասաց նա:
Անդրադառնալով առաջիկա խորհրդարանական ընտրությունների ժամանակ ընդդիմադիր ուժերի՝ մեծամասնություն ունենալու հավանականությանը՝ Կոնջորյանը հայտարարեց. «Ես վստահ եմ, որ այդպիսի բան չի լինելու, բայց եթե հանկարծ այս ընդդիմությունը Հայաստանում մի անգամ էլ իշխանություն զավթի, դա ոչ միայն բերելու է արտաքին պատերազմի, դա բերելու է նրան, որ նույն քոչարյանասերժական օլիգարխիական բանդիտների հրոսակախմբերը ներքին խժդժություններ են սանձազերծելու ամբողջ Հայաստանում:
Պատկերացնո՞ւմ եք՝ 8 տարվա մեջ ինչքան ախորժակ է կուտակվել, 8 տարվա մեջ ինչքան բան չի թալանվել, որ այս մարդիկ գալու են, իրենց երախով փորձելու են թալանել, ծվեն-ծվեն են անելու էս երկիրը»:
