Օմանից Երևան ևս մեկ հատուկ չվերթ կիրականացվի․
Օմանից Երևան մարտի 4–ին ևս մեկ հատուկ չվերթ կիրականացվի, որով Հայաստան կժամանեն Մերձավոր Արևելքում և Իրանի շուրջ ստեղծված իրավիճակի հետևանքով տարածաշրջանի տարբեր երկրներում մնացած քաղաքացիները:
Այս մասին հայտարարություն է տարածել Արաբական Միացյալ Էմիրություններում Հայաստանի դեսպանատունը՝ նշելով, որ Մասկատ-Երևան թռիչքի տոմսերը կարող են ձեռք բերել՝ զանգահարելով +37433309013 կամ +37494366540 հեռախոսահամարներով։
«Այն քաղաքացիներն, ովքեր արդեն ունեն և ձեռք կբերեն Fly One ընկերության կողմից մարտի 4-ին երեկոյան ժամը 21:00-ին կայանալիք Մասկատ-Երևան տոմսերը, կարող են օգտվել ԱՄԷ-ում ՀՀ դեսպանության և Դուբայում ՀՀ գլխավոր հյուպատոսության կողմից կազմակերպված անվճար տեղափոխման հնարավորությունից։
Տեղափոխման ցանկացություն ունեցող քաղաքացիներին խնդրում ենք անհատապես գրանցվել հետևյալ հղումով՝ https://forms.gle/v9UNjFN34GxUy7zr6՝ մինչև երեկոյան ժամը 20։00-ն»,– հայտնում են դեսպանությունից։
Ավտոբուսները շարժվելու են հետևյալ վայրերից և ժամանակացույցով․
Աբու Դաբի- ԱՄԷ-ում ՀՀ դեսպանության տարածքից (President Joko Widodo str. 63)՝ մարտի 4-ին ժամը 02:00-ին, ուղևորների հավաքը ժամը 01:30-ին։
Դուբայ՝ ՀՀ գլխավոր հյուպատոսության տարածքից (GoldCrest Executive Tower, JLT, Cluster C) մարտի 4-ին ժամը 02:00-ին, ուղևորների հավաքը ժամը 01:30-ին։
Դեսպանությունից զգուշացնում են, որ գրանցվեն բացառապես այն քաղաքացիները, որոնք արդեն ունեն մարտի 4-ին կայանալիք Մասկատ-Երևան թռիչքի հաստատված տոմս։
Ընդգծվում է, որ Աբու Դաբիից և Դուբայից մինչև Մասկատի օդանավակայան ճանապարհի տևողությունը մոտ 12-13 ժամ։
Օմանից առաջին հատուկ չվերթը մարտի 3-ին ժամը 06:15-ին ժամանել է Երևան։ Չվերթով Հայաստան են ժամանել Մերձավոր Արևելքում և Իրանի շուրջ ստեղծված իրավիճակի հետևանքով տարածաշրջանի տարբեր երկրներում մնացած քաղաքացիները:
