Իսրայելի նպատակը Թեհրանում իշխանափոխությունն է. Հաքան Ֆիդան
Իրանի շուրջ ընթացող զարգացումները վտանգում են ոչ միայն տարածաշրջանի ապագան, այլև գլոբալ կայունությունը՝ հայտարարել է Թուրքիայի արտգործնախարար Հաքան Ֆիդանը։
Նա ընդգծել է, որ արաբական երկրներում ամերիկյան բազաներին Իրանի ուղղակի հարվածներն ընդլայնում են ճգնաժամի մասշտաբները: Նախարարը հատուկ ուշադրություն է դարձրել Հորմուզի նեղուցի շուրջ ստեղծված իրավիճակին։ Ֆիդանը նշել է, որ դրա փակումը ծանր ցնցումներ կառաջացնի համաշխարհային ֆինանսական և էներգետիկ համակարգերում, ինչը կստիպի ԱՄՆ-ին ցանկացած միջոցներով անհապաղ արդյունքների հասնել:
Նա ընդգծել է, որ Անկարայի պահանջը մնում է անփոփոխ՝ անհապաղ դադարեցնել փոխադարձ հարձակումները և վերադառնալ դիվանագիտությանը։
Ֆիդանը պարզաբանել է, որ այժմ Իսրայելի նպատակը Թեհրանում իշխանափոխությունն է, սակայն Իրանի հասարակության շրջանում ներկայումս անկարգությունների նշաններ չկան, որոնք կարող են հանգեցնել ռեժիմի փոփոխության:
Թուրքիայի ԱԳ նախարարի խոսքով՝ այժմ Իրանը փորձում է բարձր գին պարտադրել հակառակորդներին:
