Այսօր արդեն դիվանագիտությունը միայն անվտանգություն ապահովող վահան չէ, այլև մեր երկիրն առաջ մղող շարժիչ. Արարատ Միրզոյան
Այսօր մարտի 2-ն է՝ Դիվանագետի օրը: ՀՀ դիվանագիտական ծառայության մասնագիտական տոնը առիթ է, կարծում եմ, անվերջանալի վազքի մեջ մի պահ դադար առնելու, այո՛, տոնելու, կարծում եմ՝ դրա իրավունքը ևս վաստակել ենք, բայց նաև մտածելու, խորհելու, վերագիտակցելու, վերագնահատելու մեր շուրջն առկա միջավայրը, ընթացող տեկտոնիկ աշխարհաքաղաքական գործընթացները, շարժերը, այդ ամեն ինչի մեջ առաքելությունը, մեր գործունեությունը, մեր մեթոդները, մեր արդյունավետությունը. Դիվանագետի օրվան նվիրված միջոցառման ժամանակ ասաց ԱԳ նախարար Արարատ Միրզոյանը:
«Վերջին տարիները ցույց են տալիս, որ դիվանագիտությունն իսկապես մեր ինքնիշխանության, տարածքային ամբողջականության, անվտանգության ճարտարապետության առանցքային բաղադրիչներից մեկն է: Չափազանցություն չի լինի ասելը՝ մեր անվտանգության առաջին պաշտպանական գիծը հենց դիվանագիտությունը, բալանսավորված և բալանսավորման արտաքին քաղաքականությունն է, որ ընթացիկ շարժերի պայմաններում կամ փոթորկվող ծովերում թույլ է տվել անվտանգ նավարկել և մեր պետականության նավը խաղաղ ջրեր բերել:
Այսօր էլ նույն գիտակցմամբ մենք ջանքեր ենք գործադրում այդ նավը հասցնելու հաջորդ տրամաբանական հանգրվանին՝ խաղաղության հետագա ինստիտուցիոնալացմանը և մեր շուրջ հանդուրժողականության, համագործակցության, բաց սահմանների միջավայրի ձևավորմանը:
Սա է այսօրվա հրամայականը՝ խաղաղության ինստիտուցիոնալացմանը զուգահեռ զարգացման օրակարգի վրա կենտրոնանալը, մեր տնտեսական կապերը դիվերսիֆիկացնելը, նոր տնտեսական հնարավորություններ ստեղծելը, ալեգորիան շարունակելով՝ մեր նավի համար նոր հորիզոններ բացահայտելը:
Այսօր արդեն դիվանագիտությունը միայն անվտանգություն ապահովող վահան չէ, այլև մեր երկիրն առաջ մղող շարժիչ, կողմնացույց:
Վստահ եմ՝ ինչպես մինչ այժմ ենք իրականացրել մեր առջև դրված խնդիրը, հետայսու ևս նոր խնդրին կամ խնդիրներին ենք մոտենալու: Միաժամանակ, իհարկե, շարունակաբար աշխատելով ինքներս մեզ վրա, բարձրացնելով մեր ծառայության որակը, համապատասխանեցնելով, արդիականացնելով մեր ծառայությունը, համապատասխանեցնելով նոր մարտահրավերներին և նոր իրողություններին:
Ըստ այդմ, շնորհավոր, սիրելի՛ դիվանագետներ, և շնորհակալություն ԱԳՆ բոլոր աշխատակիցներին, դիվանագետներին Երևանում, արտերկրում, առանձնահատուկ շնորհակալություն եմ ուզում հայտնել հակամարտության գոտիներում այսօր ծառայություն իրականացնող դիվանագետներին և, իհարկե, ամեն ինչից առաջ և ամեն ինչին զուգահեռ, ուզում եմ շնորհակալություն հայտնել դիվանագետների ընտանիքների անդամներին, որոնք դիվանագետների հետ հավասար կամ գուցե նրանցից ավելի կրում են այս ծառայությանը հատուկ անհարմարությունները»,- նշեց Միրզոյանը:
