Հույս ունեմ, որ Հայաստանի և Ադրբեջանի միջև խաղաղության համաձայնագիրը շուտով կստորագրվի. Հունաստանի նախագահ
«Հույս ունեմ, որ Հայաստանի և Ադրբեջանի միջև խաղաղության համաձայնագիրը շուտով կստորագրվի՝ ի շահ տարածաշրջանի ժողովուրդների»,- նշել է Հունաստանի նախագահ Կոնստանտինոս Տասուլասը՝ Հայաստանի նախագահ Վահագն Խաչատուրյանի հետ հանդիպմանը։ Խաչատուրյանը ներկայացրել է 2025 թվականի օգոստոսի 8-ին Վաշինգտոնում ստորագրված հռչակագրի ընձեռած հնարավորություններն ու Հարավային Կովկասում խաղաղության հաստատմանն ուղղված ջանքերը։ Առանձնազրույցին հաջորդել է ընդլայնված կազմերով հանդիպումը:
Վահագն Խաչատուրյանը Հունաստանում է պետական այցով: Օրակարգում բազմոլորտ գործակցության զարգացմանն ուղղված հարցեր են՝ անվտանգություն, տնտեսություն, առևտրաշրջանառություն, տեխնոլոգիական ոլորտ, գիտություն, կրթություն։ Մասնավորապես` տեխնոլոգիական ոլորտում Հայաստան-Հունաստան գործակցությանը նոր շունչ հաղորդելու նպատակով այսօր փոխըմբռնման հուշագիր են ստորագրել Հայաստանի բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը և Հունաստանի թվային կառավարման նախարարի առաջին տեղակալ Խրիստոս Դերմենտզոպոուլուսը։
