Թրամփը, Փաշինյանը և Ալիևը վերջ դրեցին երկարամյա պատերազմին․ Վենս
ԱՄՆ փոխնախագահ Ջեյ Դի Վենսը աշխատանքային այցով Բաքվում է։ Հրավիրված ասուլիսի ժամանակ նա նշել է, որ ԱՄՆ-ը պատրաստվում է նոր պարեկային նավակներ ուղարկել Ադրբեջան, որոնք կօգնեն ամրապնդել տարածքային ջրերի անվտանգությունը, ինչպես նաև խոսել է TRIPP նախագծի մասին։
«Մենք հույս ունենք, որ կձևավորվի տնտեսական, բնական ռեսուրսների և կարևոր հանքանյութերի ոլորտներում համագործակցության այնպիսի ձևաչափ, որը կդարձնի Ադրբեջանի և Հայաստանի միջև իսկապես տպավորիչ խաղաղության համաձայնագիրը կայուն։ Մենք գիտենք, որ բախումների կանխման և պատերազմների թույլ չտալու ամենակարևոր գործոններից մեկը երկու ժողովուրդների միջև փոխադարձ մշակութային փոխանակումներն են։ Միասին աշխատելով, այլ ոչ թե միմյանց դիմակայելով, նրանք նպաստում են շատ ավելի մեծ բարեկեցությանը»,-նշել է Վենսը։
ԱՄՆ փոխնախագահը ընդգծել է, որ այնտեղ, որտեղ նախկինում հակամարտություններ էին, այժմ անվտանգություն է հաստատվել, և դա վառ օրինակ է թե՛ նախագահ Թրամփի, թե՛ նախագահ Ալիևի առաջնորդության։
«Ինչո՞ւ է պետք կռվել իրար դեմ, եթե կարող եք առևտուր անել, գործընկերային հարաբերություններ կառուցել։ Կարծում եմ՝ ԱՄՆ–Ադրբեջան գործընկերությունը կհանգեցնի տարածաշրջանում էլ ավելի մեծ խաղաղության և անվտանգության։ Ամերիկացի աշխատողները հնարավորություն կստանան մուտք գործելու լրացուցիչ շուկաներ։ Սա կստեղծի ավելի լավ աշխարհ, որտեղ մարդիկ կզբաղվեն առևտրով՝ միմյանց հետ կռվելու փոխարեն»,-ասել է նա։
ԱՄՆ փոխնախագահն ավելացրել է․ «Թրամփը, Փաշինյանը և Ալիևը վերջ դրեցին երկարամյա պատերազմին։ Տարածաշրջանը վերջապես խաղաղության մեջ է։ ԱՄՆ նախագահի վարչակազմի նպատակը խաղաղության հաստատումն է»։
