Միրզոյանն Ադրբեջանում պահվող 19 անձանց ազատ արձակման մասով դիմեց միջազգային գործընկերներին
Թե՛ Կառավարությունը, թե՛ քաղաքական շրջանակները, թե՛ ՀՀ ժողովուրդն իսկապես ամեն հնարավոր ջանք գործադրում են՝ վստահ լինելու, որ խաղաղությունը, որը հաստատված է Հայաստանի և Ադրբեջանի միջև, տևական լինի, և որ այս խաղաղությունը, որ համաձայնագրով ձեռք ենք բերել, կօգնի մեզ՝ թե՛ երկու երկրներին, թե՛ տարածաշրջանը բերելու համագործակցության և բարգավաճման շրջան: Այդ մասին ասաց ՀՀ ԱԳ նախարար Արարատ Միրզոյանը՝ ԵԽԽՎ նստաշրջանի ժամանակ պատասխանելով ներկաների հարցերին:
«Միևնույն ժամանակ գիտակցում ենք, որ կան այս բարդագույն խնդրի բազմաթիվ հարթություններ: Մեկը հումանիտար խնդիրն է, այո՛, անհայտ կորած անձանց ճակատագիրը, Ադրբեջանում պահվող 19 անձանց գերությունից ազատ արձակումը: Սրանք հարցեր են, որոնց պետք է արդրադառնա թե՛ ՀՀ Կառավարությունը, թե՛ քաղհասարակությունը: Շարունակում ենք մեր ջանքերը և բանակցությունները, մեր քննարկումները նախևառաջ Ադրբեջանի գործընկերների հետ, բայց միևնույն ժամանակ՝ մեր միջազգային գործընկերների հետ, քանի որ ձեր աջակցությունը, ձեր ներդրումը շատ կարևոր են այս հարցի վերաբերյալ, այն հույժ կարևոր է, վճռորոշ նշանակություն ունի և մեծապես գնահատվում է»,- ասաց նախարարը:
Միրզոյանը խոսեց նաև խաղաղության ընթացակարգերի մասին՝ նշելով, որ ՀՀ վարչապետն է հայտարարել, որ տարանցման համար բաց են նաև ՀՀ սահմանները, նաև Հայաստանի և Ադրբեջանի քաղհասարակության ներկայացուցիչների միջև բազմաթիվ այցեր են տեղի ունեցել:
Խաղաղության հաստատման և Ադրբեջանի հետ հարաբերությունների կարգավորման գործընթացում ԱԳ նախարարը կարևորեց նաև սահմանազատման գործընթացը՝ այն անվանելով անկյունաքարային: Նա խոսեց նաև օգոստոսի 8-ին Վաշինգտոնում TRIPP-ի մասով երկրների միջև ձեռք բերված համաձայնության մասին, որը ևս ուղղված է տարածաշրջանային խաղաղությանը:
