Նախատեսում ենք 2030-ին զբոսաշրջությունից ստանալ շուրջ 3,8 մլրդ դոլարի եկամուտ. Պապոյանը՝ ռազմավարական ծրագրի մասին
Նպատակ կա ՀՀ-ում զարգացնել զբոսաշրջային ենթակառուցվածքները և բարձրացնել զբոսաշրջության մակարդակը: Սա հնարավորություն կտա արդեն 5 տարի հետո ունենալ ավելի շատ զբոսաշրջիկ և ավելի լայն ու դիվերսիֆիկացված շուկա, ինչի համար անհրաժեշտ է, որ ՀՀ-ն դիրքավորվի որպես զբոսաշրջային խաչմերուկ՝ որպես գրավիչ, որակյալ, անվտանգ, խաղաղ, մրցունակ, գողտրիկ զբոսաշրջային ուղղություն: Այդ մասին Կառավարության՝ հունվարի 8-ի նիստին ասաց էկոնոմիկայի նախարար Գևորգ Պապոյանը՝ ներկայացնելով Զբոսաշրջության զարգացման 2026-2030 թվականների ռազմավարական ծրագիրը հաստատելու մասին որոշման նախագիծը:
Ռազմավարական ծրագրով նախատեսված զարգացման 3 հիմնական ուղղություններն են մշակութայինը, գաստրոն՝ խոհանոց, գինի և հայկական բրենդի, ինչպես նաև արկածայինը՝ ներառյալ ձմեռային զբոսաշրջությունը: Նաև նպատակ կա զարգացնելու ագրոզբոսաշրջությունը, MICE զբոսաշրջությունը, կրոնական, բժշկական և առողջարանային զբոսաշրջությունը:
Ռազմավարական ծրագիրը սահմանել է 4 հիմնական նպատակներ. առաջինը տնտեսական ուղղությունն է, որը ենթադրում է օգտագործել զբոսաշրջության տնտեսական ներուժն ամբողջությամբ՝ զբոսաշրջության բնագավառում բարեփոխումների միջոցով նպաստելով տնտեսական առաջընթացին: Երկրորդ ուղղությունը միջազգային գրավչության բարձրացումն է, որի նպատակն է բարձրացնել Հայաստանի իմիջը՝ որպես գրավիչ զբոսաշրջային երկրի՝ շեշտը դնելով հյուրընկալության, անվտանգության վրա: Երրորդը որակի ապահովումն է, որը ենթադրում է նաև տարբերվող, բացառիկ փորձառությունների տրամադրում: Չորրորդը սոցիալական ուղղությունն է, որի շրջանակում կարիք կա կենտրոնանալու աշխատուժի թվի մեծացման վրա, ծառայությունների բարձր մակարդակի տրամադրման, ինչպես նաև զբոսաշրջային կրթությունը խթանելու:
«Ռազմավարական ծրագրի իրականացման արդյունքում նախատեսում ենք, օրինակ, 2030 թվականին ունենալ առնվազն 3 մլն ներգնա զբոսաշրջային այցելություն, զբոսաշրջությունից ստանալ շուրջ 3,8 մլրդ դոլարի եկամուտ, որից 750 մլն դոլարը կարող է գնալ պետական բյուջե, ունենալ 4,5 մլն ներքին զբոսաշրջային այցելություններ, ոլորտի հաշվին ստեղծել լրացուցիչ 20 հազար աշխատատեղ»,- ասաց նա:
