Ռուսաստանը ձգտում է Վրաստանի հետ կայուն հարաբերությունների. Կալուգին
Ռուսաստանը ձգտում է Վրաստանի հետ կայուն հարաբերությունների՝ «ՌԻԱ Նովոստի»-ին տված հարցազրույցում հայտարարել է Ռուսաստանի արտգործնախարարության ԱՊՀ երկրների չորրորդ դեպարտամենտի տնօրեն Միխայիլ Կալուգինը:
Նրա խոսքով՝ Թբիլիսին ցուցադրում է առողջ պրագմատիզմ և արտաքին հարաբերություններում բազմավեկտորության միտում՝ չմիանալով հակառուսական պատժամիջոցներին և մերժելով Ռուսաստանի դեմ «երկրորդ ճակատ» բացելու սցենարը։
«Դրա շնորհիվ վերջին մի քանի տարվա ընթացքում մենք տնտեսության մեջ զգալի հաջողությունների ենք հասել։ Մենք դիվանագիտական հարաբերություններ չունենք, բայց ունենք ակտիվ կապեր, որոնք շոշափելի օգուտներ են բերում»,- ասել է նա։
Ռուս դիվանագետի խոսքով՝ թե՛ քաղաքական, թե՛ տնտեսական իմաստով Եվրամիությունը չի արդարացրել Վրաստանի սպասելիքները։ Չնայած ԵՄ-ի հետ ասոցացման և ազատ առևտրի մասին համաձայնագրին՝ վրացական ապրանքներին, Կալուգինի խոսքով, չեն սպասում ԵՄ շուկայում:
Պաշտոնյան հավելել է, որ Մոսկվան լրջորեն է տրամադրված Թբիլիսիի հետ հարաբերությունների կարգավորման հարցում։
