Եվրոպական մի շարք երկրներ քննարկում են Ուկրաինայում հակամարտության կարգավորման այլընտրանքային առաջարկը
Նորվեգիայի վարչապետ Յոնաս Գար Ստերեն G20-ի գագաթնաժողովում հայտարարել է, որ եվրոպական մի շարք երկրներ քննարկում են Ուկրաինայում հակամարտության կարգավորման սեփական առաջարկը, որը պետք է այլընտրանք դառնա ամերիկյան նախաձեռնությանը:
Նրա խոսքով՝ եվրոպական կողմը ցանկանում է միավորվել ու հավասարակշռված տարբերակ առաջարկել, որը կհասցեագրի ԱՄՆ-ի առաջարկած ծրագրի վիճահարույց դրույթները:
Օրերս Վաշինգտոնը ներկայացրել է Ուկրաինայում խաղաղության նախագիծ, որը, ըստ ամերիկյան ԶԼՄ-ների, մշակվել է Մոսկվայի հետ: 28 կետից բաղկացած ծրագրով Ուկրաինան պետք է հրաժարվի իր արևելյան շրջաններից՝ Վաշինգտոնի անվտանգության երաշխիքների դիմաց, կրճատի զինված ուժերի թիվը, հրաժարվի ՆԱՏՕ-ին անդամակցելու գաղափարից առնվազն մի քանի տարով։
Ուկրաինայի նախագահ Վոլոդիմիր Զելենսկին նշել է, որ պատրաստ է փաստաթղթի շուրջ աշխատել գործընկերների հետ: Ակնկալվում է, որ առաջիկա օրերին Ուկրաինայի նախագահը և ԱՄՆ նախագահ Դոնալդ Թրամփը կքննարկեն խաղաղության նախագիծը:
