Թրամփը հայտարարել է, որ բաց է Իրանի հետ գործարքի համար
ԱՄՆ նախագահ Դոնալդ Թրամփը հայտարարել է, որ կցանկանար համաձայնության գալ Իրանի հետ միջուկային հարցի շուրջ։
«Ես լիովին բաց եմ դրա համար։ Մենք խոսում ենք նրանց հետ և սկսում ենք գործընթացը»,- ասել է Թրամփը Սաուդյան Արաբիայի թագաժառանգ Մուհամմեդ բին Սալմանի հետ հանդիպման ժամանակ։
«Լավ կլիներ Իրանի հետ համաձայնության գալ, և մենք կարող էինք դրան հասնել պատերազմից առաջ, բայց դա տեղի չունեցավ»,- հավելել է ԱՄՆ ղեկավարը։
«Իրանի իշխանությունները պատրաստ են վերսկսել բանակցությունները ԱՄՆ-ի հետ Իսլամական Հանրապետության միջուկային ծրագրի վերաբերյալ, եթե նրանք բավարարեն Թեհրանի պահանջները»,- CNN-ին ասել է Իրանի գերագույն առաջնորդ այաթոլլա Ալի Խամենեիի խորհրդական և Արտաքին հարաբերությունների ռազմավարական խորհրդի ղեկավար Քամալ Խարազին։
Նա հայտարարել է, որ Իրանին միջուկային վառելիքը անհրաժեշտ է քաղաքացիական նպատակներով, այդ թվում՝ բժշկական, և, հետևաբար, Թեհրանը պատրաստ է Վաշինգտոնի հետ քննարկել միայն ուրանի «հարստացման մակարդակը», այլ ոչ թե դրա դադարեցումը։
