Ռուսաստանի և Ղազախստանի միջև համապարփակ ռազմավարական գործընկերության հռչակագիր կստորագրվի. Տոկաև
Օրերս Սպիտակ տանը Դոնալդ Թրամփի հետ բանակցություններից հետո Ղազախստանի նախագահ Կասիմ-Ժոմարտ Տոկաևը երկօրյա պետական այցով կլինի Ռուսաստանում և կհանդիպի Վլադիմիր Պուտինի հետ։
Կրեմլի խոսնակը հայտնել է, որ երկու երկրի ղեկավարները կքննարկեն երկկողմ հարաբերությունները և տարբեր ոլորտներում դրանց զարգացման հեռանկարը, անդրադարձ կլինի ռուս-ուկրաինական հակամարտությանը:
«Ղազախստանը Ռուսաստանի հատուկ և արտոնյալ գործընկերն է»,- շեշտել է Դմիտրի Պեսկովը։
Տոկաևն էլ տեղեկացրել է, որ Մոսկվայի և Աստանայի միջև համապարփակ ռազմավարական գործընկերության հռչակագիր կստորագրվի։ Նրա խոսքով՝ փաստաթուղթը կհաստատի երկկողմ աննախադեպ վստահության մակարդակը, ինչպես նաև ավելի սերտ գործակցելու համատեղ հանձնառությունը։ Տոկաևը հավելել է, որ Պուտինին Ղազախստանում հարգում են որպես համաշխարհային մասշտաբի քաղաքական գործչի:
