Ստամբուլի Գլխավոր դատախազությունը Բենիամին Նեթանյահուին ձերբակալելու օրդեր է տվել. Anadolu
Ստամբուլի գլխավոր դատախազությունը Իսրայելի վարչապետ Բենիամին Նեթանյահուին ձերբակալելու օրդեր է տվել «ցեղասպանության» մեղադրանքով։ Նրանից բացի՝ ձերբակալման օրդեր է տրվել Իսրայելի կառավարության ևս 36 պաշտոնյաների և այլ քաղաքական ու ռազմական գործիչների, սոցիալական ցանցերում հայտնել է Թուրքիայի դատախազությունը։ Նրանց թվում են պաշտպանության նախարար Իսրայել Կացը, ազգային անվտանգության նախարար և ծայրահեղ աջ «Օցմա Եհուդիտ» (Հրեական ուժ) կուսակցության առաջնորդ Իտամար Բեն-Գվիրը և Իսրայելի պաշտպանության ուժերի (ՑԱՀԱԼ) շտաբի պետ, գեներալ-լեյտենանտ Էյալ Զամիրը՝ հայտնում է թուրքական Anadolu գործակալությունը։
Հաղորդագրության համաձայն՝ Գազայի հատվածում Իսրայելի իրականացրած համակարգված ցեղասպանության և մարդկության դեմ հանցագործությունների հետևանքով հազարավոր մարդիկ, այդ թվում՝ կանայք և երեխաներ են սպանվել, հազարավորները վիրավորվել են, իսկ բնակելի թաղամասերը դարձել են անմարդաբնակ։
Նշվում է նաև «Ազատության նավատորմի» դեմ Իսրայելի գործողությունների մասին, որի նավերը հոկտեմբերին Թել Ավիվը կրկին կալանել էր՝ Գազայի հատված ուղևորվելու ճանապարհին, որտեղ նրանք մտադիր էին մարդասիրական օգնություն հասցնել։ Նավատորմի նավերից մեկում, ի թիվս այլոց, եղել է նաև շվեդ բնապահպանական ակտիվիստ Գրետա Թունբերգը։
