Ռուս-ուկրաինական բանակցությունները հնարավոր կդառնան, երբ Ռուսաստանի նախագահը փոխի դիրքորոշումը. Ուկրաինայի ԱԳՆ
Կիևն արձագանքել է Մոսկվայից հնչող հայտարարություններին, թե ռուս-ուկրաինական կարգավորման հարցով ստամբուլյան բանակցային ձևաչափը վերսկսելու պայմաններ կան, և Ռուսաստանը բաց է Կիևի ներկայացուցիչների հետ ուղիղ բանակցությունները շարունակելու համար։ Ռուսաստանի արտգործնախարարությունը նաև մեղադրել է ուկրաինական կողմին՝ բանակցային գործընթացը խոչընդոտելու համար:
Ուկրաինայի ԱԳՆ խոսնակը շեշտել է՝ Վլադիմիր Պուտինը չի ցանկանում դադարեցնել պատերազմը, իսկ բանակցությունները հնարավոր կդառնան, երբ Ռուսաստանի նախագահը փոխի դիրքորոշումը։ Գեորգի Տիխին հիշեցրել է, որ ուկրաինական պատվիրակությունն այս տարի արդեն մի քանի անգամ մեկնել է Ստամբուլ՝ հանդիպելու ռուսական պատվիրակության հետ: «Սակայն, ցավոք, Մոսկվան ուղարկել է ցածր մակարդակի պաշտոնյաների, որոնք անդադար նույն վերջնագրերն են ներկայացրել և որոշումներ կայացնելու իրավասություն չեն ունեցել»,- հավելել է Ուկրաինայի ԱԳՆ խոսնակը։ Նրա խոսքով՝ պատրաստ են Ռուսաստանի և Ուկրաինայի նախագահների մակարդակով հանդիպում կազմակերպել և բանակցել հրադադարի շուրջ:
