Պոկրովսկի հատվածում իրավիճակը դարձյալ բարդ է, բայց շրջափակում չկա. Զելենսկի
Ուկրաինայի նախագահ Վոլոդիմիր Զելենսկին հերքել է այն տեղեկությունները, որ ուկրաինական զորքերը շրջափակված են Պոկրովսկում, որը Դոնեցկի մարզի ռազմավարական կարևոր լոգիստիկ կենտրոն է և մեծ նշանակություն ունի ուկրաինական բանակի համար։
«Պոկրովսկում իրավիճակը բարդ է։ Դուք գիտեք, որ այս հատվածում կենտրոնացած է թշնամու 170000 ուժ։ Դա շատ է։ Այսօր առավոտյան ես խոսել եմ գլխավոր հրամանատարի հետ. Պոկրովսկում փոփոխություններ չկան»,- ասել է Զելենսկին՝ ըստ ուկրաինական լրատվամիջոցների։
Նա նշել է, որ Պոկրովսկի համար «լուրջ մարտ» է ընթանում, քանի որ Ռուսաստանի ղեկավարությունը նպատակ է դրել գրավել քաղաքը։
Ուկրաինայի նախագահը նաև ենթադրություն է հայտնել, որ Ռուսաստանի նախագահ Վլադիմիր Պուտինը մտադիր է այցելել Պոկրովսկ:
«Պուտինն ասում է, որ կգնա Պոկրովսկ։ Խնդրեմ, թող գա։ Բոլորը կծափահարեն։ Մենք հասկանում ենք, թե ինչով կավարտվի այս ամենը»,- ասել է նա։
Զելենսկին նաև հայտնել է, որ Ուկրաինայի զինված ուժերն առաջիկայում նոր հեռահար հարվածներ են պատրաստում ՌԴ տարածքում առաջնահերթ թիրախների ուղղությամբ:
Միևնույն ժամանակ, Ուկրաինայի անվտանգության ծառայության ղեկավար Վասիլ Մալյուկը հայտարարել է, որ Ուկրաինայի պաշտպանության նախարարության գլխավոր հետախուզական վարչության և Արտաքին հետախուզության ծառայության ուժերը Ռուսաստանի տարածքում՝ Կապուստին Յարում, հաջողությամբ ոչնչացրել են «Օրեշնիկ» երեք հրթիռներից մեկը:
