Ռուսաստանը հարձակվել է Ուկրաինայի երկաթուղային ենթակառուցվածքների վրա
Ուկրաինայի զինված ուժերի տվյալներով՝ հոկտեմբերի 30-ի լույս 31-ի գիշերը Ռուսաստանն Ուկրաինայի ուղղությամբ արձակել է «Իսկանդեր-Մ» բալիստիկ հրթիռ և 145 գրոհային անօդաչու թռչող սարք։ Ըստ նախնական հաղորդագրությունների՝ հանրապետության հակաօդային պաշտպանությունը խոցել է հրթիռը և 107 անօդաչու թռչող սարք երկրի հյուսիսում, հարավում և արևելքում։ 36 անօդաչու թռչող սարքերին, սակայն, հաջողվել է հարվածել 20 վայրում։
Ռուսաստանի հարվածները հիմնականում ուղղված են եղել Ուկրաինայի երկաթուղային ենթակառուցվածքներին: Հարձակման են ենթարկվել Խարկովի և Սումիի մարզերի երկաթուղային կառույցները, ինչի հետևանքով վնասվել և ավերվել են օժանդակ շինություններ, շարժակազմը, վիրավորվել է երկու մարդ։
Ռուսական ուժերը անօդաչու թռչող սարքերով հարվածներ են հասցրել նաև այլ ենթակառուցվածքների և բնակելի թաղամասերի։ Սումիի բազմաբնակարան շենքի վրա հարձակման հետևանքով 11 մարդ է վիրավորվել, այդ թվում՝ 4 երեխա:
