Բուսանում տեղի է ունեցել Թրամփ-Սի հանդիպումը
Ամերիկյան և չինական լրատվամիջոցները հաղորդում են, որ Հարավային Կորեայի Բուսան քաղաքում ավարտվել են ԱՄՆ նախագահ Դոնալդ Թրամփի և Չինաստանի նախագահ Սի Ծինփինի բանակցությունները։ Հանդիպումը տևել է մեկուկես ժամից ավելի։
Թրամփն իր ինքնաթիռում լրագրողներին ասել է, որ Սիի հետ բանակցություններում համաձայնության են եկել բազմաթիվ հարցերի շուրջ։ Նա կարծում է, որ Չինաստանի հետ առևտրային գործարքը շուտով կստորագրվի, քանի որ երկու կողմերը «շատ խոչընդոտներ չունեն»։
Թրամփը հայտնել է, որ Բուսանում հանդիպման ժամանակ լուծվել է Չինաստանի հազվագյուտ մետաղների մատակարարման հետ կապված խնդիրը՝ հաղորդում է CNN-ը: Հոկտեմբերին Չինաստանը զգալիորեն ուժեղացրել էր ամենակարևոր օգտակար հանածոների արտահանման նկատմամբ վերահսկողությունը, ինչը պատասխան էր սեպտեմբերի վերջին Վաշինգտոնի կողմից ԱՄՆ տեխնոլոգիաների արտահանման վերահսկողության ընդլայնմանը։
Ըստ ԶԼՄ-ների տվյալների՝ Թրամփը և Սին չեն քննարկել Չինաստանի կողմից ռուսական նավթի գնումները։
CNN-ի փոխանցմամբ՝ ԱՄՆ նախագահը բանակցություններից հետո լրագրողներին նաև հայտնել է, որ հանդիպման ընթացքում զգալի ժամանակ են հատկացրել ուկրաինական ճգնաժամի քննարկմանը։ Թրամփի խոսքով՝ իրենք համաձայնել են, որ հակամարտության կողմերը «խրված են դրանում», և որ երբեմն նրանց պետք է թույլատրվի շարունակել, բայց Սի Ծինփինը կօգնի Միացյալ Նահանգներին, և կողմերը միասին կաշխատեն Ուկրաինայի հարցում։
Չինաստանի ղեկավարն էլ հայտարարել է, որ պատրաստ է համագործակցել ԱՄՆ-ի հետ միջազգային հակամարտությունների լուծման և համաշխարհային խաղաղության պահպանման հարցում։
