Հարավային Կորեայի նախագահը Թրամփին ոսկե թագ է նվիրել
ԱՄՆ նախագահ Դոնալդ Թրամփը հանդիպել է Հարավային Կորեայի նախագահ Լի Չժե Մյունի հետ։ Գյունջու քաղաքում ամերիկացի առաջնորդին դիմավորել են ռազմական պատիվներով և շքեղ նվերներով։
Թրամփին նվիրել են Հարավային Կորեայի պատմական ոսկե թագի կրկնօրինակը։ Նա նաև դարձել է առաջին ամերիկացի առաջնորդը, որին շնորհվել է Հարավային Կորեայի բարձրագույն պարգևը՝ Մուգունհվայի մեծ շքանշանը՝ ի նշան Կորեական թերակղզում խաղաղություն հաստատելու նրա ջանքերի։
Թրամփն ավելի վաղ նշել էր Հարավային Կորեայում իր մնալը երկարաձգելու հնարավորության մասին՝ Հյուսիսային Կորեայի առաջնորդ Կիմ Չեն Ընի հետ հանդիպելու համար, սակայն չորեքշաբթի հայտարարել է, որ իր գրաֆիկը «շատ խիտ է»։
Ի դեպ, Թրամփի այցի նախօրեին Հյուսիսային Կորեան փորձարկել է թևավոր հրթիռ, ինչը Թրամփը հրաժարվել է մեկնաբանել՝ ասելով, որ «նրանք տասնամյակներ շարունակ հրթիռներ են արձակում, հետո ի՞նչ»։
Լի Չժե Մյունը գովաբանել է Թրամփին Հյուսիսային Կորեայի առաջնորդի հետ երկխոսություն սկսելու պատրաստակամության համար՝ հույս հայտնելով, որ Կիմը կտեսնի Թրամփի «իրական մտադրությունները»։
Հինգշաբթի Ասիա-Խաղաղօվկիանոսյան տնտեսական համագործակցության գագաթնաժողովից առաջ ԱՄՆ նախագահը հանդիպել է բիզնես առաջնորդների հետ և հայտարարել, որ Ասիա կատարած իր այցի ընթացքում «բեկումնային համաձայնագրեր» է ստորագրել Մալայզիայի, Կամբոջայի ու Ճապոնիայի հետ։
