Ռուսական «Օրեշնիկ»-ը Բելառուսում մարտական հերթապահության կանցնի դեկտեմբերին. Interfax
Բելառուսի նախագահի մամուլի քարտուղար Նատալյա Էյսմոնտը հայտնել է, որ ռուսական «Օրեշնիկ» հրթիռային համալիրը Բելառուսում մարտական հերթապահության կանցնի այս տարվա դեկտեմբերին՝ գրում է Interfax-ը։
«Բելառուսի Հանրապետությունում ավարտվում է «Օրեշնիկ» հրթիռային համալիրի տեղակայման համար պայմանների ստեղծումը։ Այն մարտական հերթապահության կանցնի այս տարվա դեկտեմբերին, ուստի «Օրեշնիկի» լինել-չլինելու վերաբերյալ բոլոր խոսակցությունները սպառված են»,- ասել է Էյսմոնտը։
Բելառուսի նախագահ Ալեքսանդր Լուկաշենկոն հայտարարել է, որ երկրում ռուսական «Օրեշնիկ» հրթիռային համալիրի տեղակայման պլանները ագրեսիա չեն, այլ ազգային անվտանգությունն ապահովելու ձգտում՝ ի պատասխան տարածաշրջանում իրավիճակի սրման:
«Սա ամենավտանգավոր զենքերից մեկն է։ Սխալի կամ սադրանքի դեպքում պարզապես ժամանակ չի լինի իրավիճակը կարգավորելու համար։ Այսպիսով, այս զենքի տեղակայումը Բելառուսում ոչ այլ ինչ է, քան պատասխան միջոցներ տարածաշրջանում իրավիճակի սրմանը և ժամանակակից սպառնալիքներին»,- ասել է Լուկաշենկոն Եվրասիական անվտանգության հարցերով III միջազգային խորհրդաժողովում ունեցած ելույթում։
