Որ ընտրություններում մենք վարչական ռեսուրս օգտագործելու փորձ անենք, պարտվելու ենք. Փաշինյան
Որ ընտրություններում մենք վարչական ռեսուրս, ուզելով թե չուզելով, անուղղակի օգտագործելու փորձ անենք, այդ ընտրություններում մենք պարտվելու ենք: Սա եղել է և կա իմ համոզմունքը: Այդ մասին ԱԺ-ում հայտարարեց ՀՀ վարչապետ Նիկոլ Փաշինյանը՝ արձագանքելով ՔՊ խմբակցության պատգամավոր Զարուհի Բաթոյանի հարցին:
«Տարօրինակ է, որ մենք այս թեման կարող ենք քննարկել: Մենք վարչական ռեսուրս կիրառելո՞վ ենք Հայաստանում հեղափոխություն արել: Ինչպե՞ս կարող է որևէ քաղաքական ուժ իր հաջողության պատմությունից հրաժարվի և մտածի, որ կարող է Սերժի ու Ռոբերտի հաջողության պատմությունը ավելի հետաքրքիր է. դա ինքնասպանություն է այդ քաղաքական ուժի համար և քաղաքական գործչի համար: Սա իմ համոզմունքն է: Որտեղ մենք այդ տրամաբանությամբ մտածենք, նույնիսկ չգործենք, այնտեղ միանշանակ պարտվելու ենք: Ես որևէ կասկած չունեմ, իսկ որտեղ մնանք մեր արժեքների շրջանակում, մենք այնտեղ, միանշանակ, հաղթելու ենք: Ապացույցը 2021 թվականի խորհրդարանական ընտրություններն են, որը ամբողջ միջազգային հանրության կողմից որակվեց որպես ազատ, մրցակցային և այդպես շարունակ:
Կամ, որ մեզ կասկածում են քաղաքական տեխնոլոգիա կիրառելու մեջ. այնտեղ, որտեղ մենք քաղաքական տեխնոլոգիա փորձ անենք կիրառել, այնտեղ մենք պարտվելու ենք, որովհետև մեր քաղաքական տեխնոլոգիան էմոցիան է, օրգանիկ կապը ժողովրդի հետ և սերն է ժողովրդի և մեր երկրի նկատմամբ: Ի՞նչ տեխնոլոգիա, տեխնոլոգիայով ի՞նչ անենք, որ ի՞նչ լինի:
Էդքան քննարկում են PR, այս բառը բոլորը գիտեն: PR-ը՝ հանրային հարաբերություններ: Այսինքն՝ հաղորդակցվել հանրության հետ և հանրության հետ հաղորդակցվելու նորանոր ձևեր գտնել կամ առիթներ գտնել և այդպես շարունակ: Այդ հաղորդակցությունը եթե անկեղծ չէ, բովանդակություն չկա տակը, ինչքան ուզում են տեխնոլոգիա դնեն: Դա չի փրկել 2018 թվականին ոմանց, չի օգնել 2021 թվականին, չի օգնել 2021 թվականից հետո մինչև հիմա և հետագայում էլ չի օգնելու, որովհետև առանց բովանդակության չի լինում քաղաքականություն»,- նշեց վարչապետը:
