Ռուսաստանը շարունակում է Ուկրաինայում ռազմական գործողությունները այլընտրանքի բացակայության պատճառով. Պեսկով
Ռուսաստանը շարունակում է Ուկրաինայում ռազմական գործողությունները այլընտրանքի բացակայության պատճառով՝ հայտարարել է Ռուսաստանի նախագահի մամուլի քարտուղարը: Միևնույն ժամանակ, Դմիտրի Պեսկովը հավատացրել է, որ Մոսկվան պատրաստ է երկխոսության և խաղաղ կարգավորման։
«Այսպես թե այնպես, Ռուսաստանը կպաշտպանի իր շահերը և կհասնի բոլոր նպատակներին»,- ընդգծել է պաշտոնյան։
Պեսկովը հավելել է, որ ռուսական կողմը ողջունում է ռուս-ուկրաինական կարգավորման ուղղությամբ Վաշինգտոնի և անձամբ ԱՄՆ նախագահի ջանքերը:
Նա նաև մեկնաբանել է Դոնալդ Թրամփի հայտարարությունը, որ Թուրքիայի նախագահը կարող է կարևոր դեր խաղալ պատերազմի դադարեցման գործում, քանի որ Մոսկվայում հարգում են Ռեջեփ Թայիփ Էրդողանին: Պեսկովի խոսքով՝ Ռուսաստանը և Թուրքիան այդ հարցով դեռ նոր շփումներ չեն ունեցել: «Սակայն Վլադիմիր Պուտինը և Ռեջեփ Էրդողանը կարող են շատ արագ համաձայնության գալ և հեռախոսազրույց անցկացնել»,- նշել է Կրեմլի խոսնակը:
