Ռուսաստանը, Ադրբեջանը և Իրանը պայմանավորվածություններ են ձեռք բերել «Հյուսիս-հարավ» միջանցքի զարգացման շուրջ
Ռուսաստանը, Ադրբեջանը և Իրանը պայմանավորվել են աշխատանքային խումբ ստեղծել մինչև հաջորդ տարվա սկիզբը՝ «Հյուսիս-հարավ» միջազգային տրանսպորտային միջանցքի զարգացման միջոցառումների ծրագրի մշակման համար: Այդ մասին նշված է տրանսպորտի, էներգետիկայի և մաքսային ոլորտներում համագործակցության հարցերի շուրջ Բաքվում կայացած եռակողմ հանդիպման ավարտին հրապարակված կոմյունիկեում:
Ռուսական կողմից հանդիպմանը մասնակցել է փոխվարչապետ Ալեքսեյ Օվերչուկը, Ադրբեջանից՝ փոխվարչապետ Շահին Մուստաֆաևը, Իրանից՝ ճանապարհների և քաղաքաշինության նախարար Ֆարզանա Սադեղը:
«Ընդգծվել է «Հյուսիս-հարավ» միջազգային տրանսպորտային միջանցքով փոխադրումների ծավալը մինչև 15 մլն տոննա ավելացնելու և բեռնափոխադրումների հոսքերի շարունակական աճ ապահովելու ուղղությամբ միջոցներ ձեռնարկելու անհրաժեշտությունը։ Պայմանավորվածություն է ձեռք բերվել աշխատանքային խումբ ստեղծելու մասին՝ երեք ամսվա ընթացքում նախատեսված միջոցառումների իրականացման գործողությունների ծրագրի նախապատրաստման համար»,- նշված է փաստաթղթում:
Հանդիպման ընթացքում ընդգծվել է տարածաշրջանի տարանցիկ ներուժի զարգացմանն ուղղված ջանքերի շարունակման, ինչպես նաև տրանսպորտային հաղորդակցությունների զարգացմանն ու դիվերսիֆիկացմանն ուղղված նախագծերի արագացման կարևորությունը, ինչպես նաև երկրների տարածքներում ենթակառուցվածքների ընդլայնման աշխատանքների համաժամանակյա իրականացումը:
Կողմերը պայմանավորվել են նաև ավտոմոբիլային փոխադրումների հարցերով հատուկ աշխատանքային խմբի ստեղծման մասին, որը բաղկացած է երեք երկրների մաքսային, սահմանային և տրանսպորտային գերատեսչությունների ներկայացուցիչներից:
«Ընդգծվել է սահմանների հատման ընթացակարգերի պարզեցման և միջանցքի ողջ երկայնքով տրանսպորտային, սահմանային ու մաքսային գործառնությունների թվայնացման անհրաժեշտությունը»,- նշված է փաստաթղթի տեքստում:
Կողմերը նաև պայմանավորվել են տեխնիկական մակարդակով շարունակել Ադրբեջանի, Իրանի և Ռուսաստանի միջև էլեկտրական ցանցերի միացման նախագծի քննարկումները:
