ՆԱՏՕ-ի ԽՎ-ն կոչ է անում մեծացնել պաշտպանական ներդրումները և ուժեղացնել զսպման կարողությունները
ՆԱՏՕ-ի Խորհրդարանական վեհաժողովը այսօր հանդես է եկել դաշինքի անդամ երկրների կառավարություններին ուղղված կոչով. «Մեծացնել ներդրումները պաշտպանության ոլորտում, ուժեղացնել զսպումը, հատկապես դաշինքի արևելյան թևում»:
«Որպես խորհրդարանականներ՝ մենք պետք է մեր քաղաքացիներին հասցնենք պաշտպանության ոլորտում ներդրումների ավելացման անհրաժեշտությունը»,- հայտարարել է ՆԱՏՕ-ի ԽՎ նախագահ Մարկոս Պերեստրելլոն վեհաժողովի ամենամյա նստաշրջանի եզրափակիչ միջոցառման ժամանակ: «Մենք պետք է շարունակենք ներդրումներ կատարել հավաքական պաշտպանության, պատերազմը կանխելու, մեր ազատությունը և մեր ապրելակերպը պաշտպանելու համար անհրաժեշտ ուժերի և միջոցների մեջ»:
Վեհաժողովը, որին մասնակցում են Հյուսիսատլանտյան դաշինքի 32 անդամ և գործընկեր երկրների օրենսդիրներ, Լյուբլյանայում իր քառօրյա նստաշրջանի ավարտին ՆԱՏՕ-ի երկրների կառավարությունների համար ընդունել է մի շարք քաղաքական հանձնարարականներ:
Լյուբլյանայում հաստատված առաջարկությունների շարքում օրենսդիրները կոչ են արել «հնգապատիկ» ավելացնել հակաօդային և հակահրթիռային պաշտպանությունը Հյուսիսատլանտյան դաշինքի արևելյան թևում, ավելի վճռական գործողություններ՝ հակազդելու վնասակար արտաքին ազդեցությանը, որը ձգտում է խաթարել կայունությունը Արևմտյան Բալկաններում, ներդրումներ կատարել հասարակության կայունության մեջ՝ հիբրիդային սպառնալիքներից պաշտպանվելու համար, անդրատլանտյան տնտեսական համակարգում՝ պաշտպանական ծախսերի առավելագույն ազդեցության համար, և նորարարությունների ակտիվացում՝ անօդաչու թռչող սարքերի դեմ պայքարում առավելությունը պահպանելու համար:
Վեհաժողովը Բենեդետա Բերտիին նշանակել է վեհաժողովի նոր գլխավոր քարտուղար և հարգանքի տուրք մատուցել նախորդ քարտուղար Ռուկսանդրա Պոպային, ով այդ պաշտոնը զբաղեցնում էր 2020 թվականից:
ՆԱՏՕ ԽՎ հաջորդ նստաշրջանը կանցկացվի 2026 թվականի մայիսի 29-ից հունիսի 1-ը Լիտվայի Վիլնյուս քաղաքում:
