Հարավային Կովկասում խաղաղության նոր էջ է բացվում. Պարույր Հովհաննիսյան
ՄԱԿ-ում ՀՀ մշտական ներկայացուցիչ Պարույր Հովհաննիսյանը մասնակցել է ՄԱԿ-ի գլխավոր ասամբլեայի 80-րդ նստաշրջանի առաջին կոմիտեի ընդհանուր քննարկմանը։
«Արմենպրես»-ի փոխանցմամբ՝ ինչպես հայտնում է ՄԱԿ-ում ՀՀ մշտական ներկայացուցչությունը, Պարույր Հովհաննիսյանն ընդգծել է, որ գլոբալ զինաթափումը և չտարածումը Հայաստանի արտաքին քաղաքականության օրակարգի առաջնահերթություններից է։
Նա հավելել է, որ սովորական սպառազինությունների վերահսկման ամուր և արդյունավետ ռեժիմը վստահության և անվտանգության ամրապնդման միջոցառումների հետ մեկտեղ կարևոր են միջազգային և տարածաշրջանային մակարդակներում խաղաղության պահպանման համար։
Դեսպան Հովհաննիսյանն ընդգծել է, որ օգոստոսի 8-ին Վաշինգտոնում Հայաստանի և Ադրբեջանի միջև հռչակագրի ստորագրմամբ ձեռք բերված առաջընթացը վերահաստատել է վստահությունն առ այն, որ Հարավային Կովկասում բացվում է խաղաղության, կայունության և տարածաշրջանային համագործակցության նոր էջ։
