Թույլ չեմ տա Իսրայելին բռնակցել Արևմտյան ափը. Թրամփ
Դոնալդ Թրամփը հայտարարել է, որ թույլ չի տա Իսրայելին բռնակցել օկուպացված Արևմտյան ափը՝ մերժելով Իսրայելի որոշ ծայրահեղ աջ քաղաքական գործիչների կոչերը, որոնք ցանկանում են ընդլայնել ինքնիշխանությունը այդ տարածքի նկատմամբ և դրանով անհնար դարձնել Պաղեստին պետության ստեղծումը` գրում է The Guardian-ը։
«Ես թույլ չեմ տա Իսրայելին անեքսիայի ենթարկել Արևմտյան ափը։ Ո՛չ, ես դա թույլ չեմ տա: Դա տեղի չի ունենալու: Բավական է, ժամանակն է կանգ առնել»,- ասել է ԱՄՆ նախագահը լրագրողներին` Օվալաձև աշխատասենյակում:
Պարբերականը նկատել է, որ Թրամփը մեկնաբանություններն արել է այն ժամանակ, երբ Իսրայելի վարչապետ Բենիամին Նեթանյահուն ժամանում էր Նյու Յորք՝ ուրբաթ ՄԱԿ-ում ելույթ ունենալու։
Նեթանյահուն զգալի ճնշման է ենթարկվում իր իշխող կոալիցիայի մաս կազմող ծայրահեղ աջ խմբակցությունների կողմից՝ Արևմտյան ափը անեքսիայի ենթարկելու հարցում, ինչը մտահոգություն է առաջացրել արաբ առաջնորդների շրջանում: Նրանցից մի քանիսը երեքշաբթի հանդիպել են Թրամփի հետ ՄԱԿ-ի Գլխավոր վեհաժողովի շրջանակներում։
Արաբական և մուսուլմանական երկրները նախազգուշացրել են Թրամփին Արևմտյան ափի ցանկացած անեքսիայի ծանր հետևանքների մասին, ուղերձ, որն ըստ Սաուդյան Արաբիայի արտաքին գործերի նախարար արքայազն Ֆեյսալ բին Ֆարհան ալ Սաուդի, ԱՄՆ նախագահը «շատ լավ է հասկանում»։
