ՌԴ ԱԳՆ-ն՝ Լավրովի և Ռուբիոյի հանդիպման մասին․ Ռուսաստանը դեմ է «հակամարտության ձգձգման սխեմաներին»
Ռուսաստանի արտաքին գործերի նախարարությունն անդրադարձել է արտգործնախարար Սերգեյ Լավրովի և ԱՄՆ պետքարտուղար Մարկո Ռուբիոյի հանդիպմանը, որը տեղի է ունեցել սեպտեմբերի 24-ին` Նյու Յորքում՝ ՄԱԿ Գլխավոր վեհաժողովի 80-րդ նստաշրջանի շրջանակում։
Հանդիպումը տևել է շուրջ 50 րոպե։ ՌԴ ԱԳ նախարարությունից հայտնել են, որ Լավրովը և Ռուբիոն «փոխանակել են կարծիքներ ուկրաինական ճգնաժամի կարգավորման վերաբերյալ»։ Լավրովն ասել է, որ Ռուսաստանը պատրաստ է «ԱՄՆ-ի հետ համատեղելու ուժերը՝ ուկրաինական ճգնաժամի հիմնարար պատճառները վերացնելու ուղղությամբ», ինչպես նաև անընդունելի է համարել «հակամարտության ձգձգմանն ուղղված սխեմաները»։
Հիշեցնենք՝ հանդիպման վերաբերյալ ԱՄՆ Պետքարտուղարության հայտարարության մեջ նշվում է, որ Մարկո Ռուբիոն կրկնել է նախագահ Թրամփի կոչը՝ դադարեցնել սպանությունները և ընդգծել է Մոսկվայի կողմից էական քայլեր ձեռնարկելու անհրաժեշտությունը՝ ռուս-ուկրաինական հակամարտության երկարաժամկետ կարգավորման համար։
