Թրամփն ասել է, որ Ուկրաինան կարող է հետ վերցնել իր տարածքները Եվրոպայի և ՆԱՏՕ-ի օգնությամբ
ԱՄՆ նախագահ Դոնալդ Թրամփը կտրուկ փոխել է իր դիրքորոշումը Ուկրաինական պատերազմի հարցում՝ ասելով, որ Ուկրաինան, Եվրոպայի և ՆԱՏՕ-ի աջակցությամբ, կարող է վերականգնել իր նախնական սահմանները՝ վերագրավելով Ռուսաստանի բռնազավթած տարածքները։
Նյու Յորքում ՄԱԿ-ի Գլխավոր վեհաժողովի շրջանակում Ուկրաինայի նախագահ Վլադիմիր Զելենսկու հետ հանդիպումից հետո Թրամփը սոցիալական ցանցում գրել է. «Կարծում եմ՝ Ուկրաինան, ԵՄ-ի աջակցությամբ, ի վիճակի է պայքարել և ՀԱՂԹԵԼ՝ վերադարձնելով Ուկրաինան իր սկզբնական տեսքով»։
Այս հայտարարությունը կտրուկ տարբերվում է նրա նախորդ դիրքորոշումից, ըստ որի Կիևը պետք է զիջումներ անի Մոսկվային՝ պատերազմին վերջ դնելու համար, այդ թվում՝ տարածքային կորուստների գնով։
Թրամփը նշել է, որ Ռուսաստանի պատերազմը դարձել է աննպատակ, և Մոսկվան «թղթե վագրի» է նմանվում՝ տնտեսական մեծ խնդիրների ֆոնին։ Նա հավելել է, որ այժմ հենց Ուկրաինայի գործողությունների ժամանակն է։
Զելենսկին Fox News-ին ասել է, որ Թրամփը իրենց հանդիպման ընթացքում խոստացել է ավելացնել ճնշումը Մոսկվայի վրա։ «Մեզ պետք է ուղղակի ճնշում հենց Պուտինի վրա՝ էներգետիկայի, ֆինանսների և բանկային համակարգի ուղղություններով։ Մենք մանրամասն քննարկել ենք այս հարցերը և սպասում ենք ԱՄՆ-ի պատժամիջոցներին»։
Թրամփը չի բացառել, որ ՆԱՏՕ-ի դաշնակիցները կարող են խոցել ռուսական ինքնաթիռներ, եթե դրանք խախտեն եվրոպական օդային տարածքը։ Սակայն նշել է, որ ԱՄՆ-ի զինված ուժերի անմիջական ներգրավվածությունը կախված կլինի հանգամանքներից։
Եվրոպայում վերջին շաբաթներին բարձր է լարվածությունը՝ Ռուսաստանի կողմից ՆԱՏՕ-ի անդամ երկրների օդային տարածքի բազմակի խախտումների պատճառով, այդ թվում՝ Լեհաստանի, Ռումինիայի և Էստոնիայի։
ԱՄՆ պետքարտուղար Մարկո Ռուբիոն, սակայն, ավելի զգուշավոր է արտահայտվել՝ նշելով, որ ռուսական ինքնաթիռները պետք է որսալ, իսկ խոցել միայն այն դեպքում, եթե դրանք հարձակվեն։
