Թրամփն առաջարկել է իրեն քննադատող հեռուստաալիքներին զրկել լիցենզիայից. BBC
Ջիմի Քիմելի երեկոյան հաղորդումը ABC-ի եթերից հանելուց հետո ԱՄՆ նախագահ Դոնալդ Թրամփն առաջարկել է իրեն քննադատող հեռուստաընկերություններին ընդհանրապես զրկել լիցենզիայից՝ հայտնում է BBC-ն։
«Ես ինչ-որ տեղ կարդացել եմ, որ հեռուստաընկերությունների 97 տոկոսն ինձ դեմ է եղել, բայց միևնույն է, ես հաղթեցի, ընդ որում՝ հեշտությամբ, բոլոր յոթ տատանվող նահանգում»,- ասել Է Թրամփը լրագրողներին։
ABC հեռուստաալիքը, որը պատկանում է Disney կորպորացիային, չորեքշաբթի հայտարարել է, որ անորոշ ժամանակով եթերից հանում է կատակերգու Ջիմի Քիմելի երեկոյան հաղորդումը՝ Չառլի Քըրքի սպանությանը Թրամփի արձագանքի և նախագահի կողմնակիցների «հրոսակախմբի» մասին նրա խոսքի պատճառով:
Հաղորդակցությունների դաշնային հանձնաժողովը (FCC), որը գլխավորում է Թրամփի կողմնակից Բրենդան Քարը, սպառնացել է միջոցներ ձեռնարկել, որից հետո ABC-ն հայտարարել է Քիմելի հաղորդումը չեղարկելու մասին։
Հինգշաբթի Բրենդան Քարը Fox-ի եթերում հայտարարել է, որ Քիմելի միջադեպը վերջինը չի լինի։
