Ուկրաինան հարվածել է Ռուսաստանի խոշորագույն նավթավերամշակման գործարաններից մեկին
Ուկրաինական անօդաչու թռչող սարքերը հարվածել են Ռուսաստանի խոշորագույն նավթավերամշակման գործարաններից մեկին, ինչի հետևանքով օբյեկտում հրդեհ է բռնկվել։
Ռուսաստանի Լենինգրադի մարզում գտնվող Կիրիշիի նավթավերամշակման գործարանը դարձել է ռուսական նավթային ենթակառուցվածքների վրա ուկրաինական հարձակումների հերթական թիրախը, որը, ըստ Կիևի, Կրեմլն օգտագործում է Ուկրաինայում պատերազմը ֆինանսավորելու համար։
Ռուսական նավթային հսկա «Սուրգուտնեֆտեգազի» շահագործած օբյեկտը տարեկան արտադրում է մոտ 18 միլիոն տոննա հում նավթ և արտադրանքի ծավալով Ռուսաստանի երեք խոշորագույն ձեռնարկություններից մեկն է։
Ըստ Ուկրաինայի զինված ուժերի գլխավոր շտաբի՝ Կիրիշիի նավթավերամշակման գործարանում պայթյուններ են տեղի ունեցել, և հրդեհ է բռնկվել։ Լենինգրադի մարզի նահանգապետ Ալեքսանդր Դրոզդենկոն հայտնել է, որ հրդեհն առաջացել է անօդաչու թռչող սարքի բեկորներից, որ հարձակումների հետևանքով քաղաքացիական անձինք չեն տուժել, հրդեհը մարվել է։ Պաշտոնյաները հրաժարվել են մեկնաբանել օբյեկտին հասցված վնասի չափը։
Ռուսաստանի պաշտպանության նախարարությունը հայտնել է, որ կիրակի առավոտյան ավելի քան 80 ուկրաինական անօդաչու թռչող սարք է որսացել։
