Օվերչուկի հանդիպումներն անցել են պրոֆեսիոնալ, անկեղծ մթնոլորտում. Զախարովա
ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ անդրադարձել է Հարավային Կովկասի իրադրությանը:
Նրա խոսքով՝ Մոսկվայի համար կարևոր է, որ Հարավային Կովկասում խաղաղության գործընթացները լինեն կայուն ու երկարաժամկետ, հաշվի առնվեն տարածաշրջանի բոլոր երկրների և նրանց հարևանների շահերը: Զախարովայի ձևակերպմամբ՝ արտատարածաշրջանային դերակատարների ներգրավումը չպետք է սնուցի տարածաշրջանի կոնֆլիկտային ներուժը և բաժանարար նոր գծեր ստեղծի:
«Այս մոտեցումը վերաբերում է նաև տարածաշրջանի տրանսպորտային հաղորդակցությունների ապաշրջափակմանը: Ցանկանում եմ կրկնել, որ Ռուսաստանի, Հայաստանի և Ադրբեջանի ղեկավարների՝ 2020-2022 թվականների համաձայնագրերը մնում են արդիական, կողմերից որևէ մեկը դրանցից չի հրաժարվել»,- ասել է դիվանագետը:
Նա մեկնաբանել է օգոստոսի 8-ին Սպիտակ տանը Հայաստանի, Միացյալ Նահանգների և Ադրբեջանի ղեկավարների պայմանավորվածությունները:
«Վաշինգտոնյան համատեղ հայտարարությունը վերահաստատում է կողմերի ինքնիշխանության, տարածքային ամբողջականության և իրավասության նկատմամբ հարգանքի սկզբունքները, որոնց հիման վրա նախատեսվում է երկու հանրապետության միջև կառուցել հաղորդակցություններ: Սրանք հենց այն հիմնարար դրույթներն են, որոնք համաձայնեցվել են դեռ երկու տարի առաջ: Միևնույն ժամանակ պետք է նշեմ, որ Թրամփի ուղու վերաբերյալ մանրամասներ դեռ չունենք»,- նշել է ՌԴ ԱԳՆ ներկայացուցիչը:
Ռուս պաշտոնյան անդրադարձել է Հայաստանի և Ռուսաստանի միջև բարեկամության, համագործակցության և փոխադարձ օգնության մասին պայմանագրին, նշել՝ ռուսական կողմը մեծ նշանակություն է տալիս այդ փաստաթղթին։
«Բազմիցս կրկնել ենք, որ պատրաստ ենք լուրջ զրույցի հայկական կողմի հետ՝ արդիականացնելու մեր համաձայնությունները և պայմանագրային պարտավորությունները։ Համաձայնագրում առանձին տեղ է հատկացված առևտրատնտեսական հարաբերությունների ամրապնդմանը, մասնավորապես՝ խոսքը տնտեսական ինտեգրման հետևողական խորացման մասին է»,- ասել է Զախարովան։
Նա շեշտել է՝ Մոսկվան գնահատում է Հայաստանի հետ դաշնակցային բազմակողմանի հարաբերությունները և վճռական է դրանք աստիճանաբար զարգացնելու հարցում ու հավելել, որ Երևանում Ռուսաստանի փոխվարչապետ Ալեքսեյ Օվերչուկի հանդիպումները կառուցողական են եղել, դրանք ցույց են տվել, որ Հայաստանը հետաքրքրված է տնտեսական երկկողմ գործակցությամբ և եվրասիական ինտեգրման մեխանիզմների ռիթմիկ գործունեությամբ:
