Իսրայելը նոր ավիահարվածներ է հասցրել Գազայի հատվածին
Իսրայելը նոր ավիահարվածներ է հասցրել Գազայի հատվածին, որոնք շուրջ երկու տասնյակ մարդու կյանք են խլել: Վերջին 24 ժամվա ընթացքում զոհերի թիվը գերազանցել է 70-ը: ՄԱԿ-ի կազմակերպությունները պաշտոնապես հայտարարել են Գազայում սովի առկայության մասին՝ չնայած Իսրայելը հերքում է դա:
Իսրայելի պաշտպանության նախարարն ավելի վաղ հայտարարել էր, որ իշխանությունները հաստատել են Գազայում ՀԱՄԱՍ-ին ջախջախելու պլանները: Իսրայել Կացը նշել էր, որ ՀԱՄԱՍ-ի համար կբացվեն դժոխքի դռները, եթե շարժումը չհամաձայնի պատերազմի ավարտի Իսրայելի պայմաններին, առաջին հերթին՝ բոլոր պատանդների վերադարձին և շարժման զինաթափմանը:
ՀԱՄԱՍ-ը հայտարարել է, որ պատրաստ է ազատ արձակել պատանդներին պատերազմն ավարտելու դիմաց, սակայն հրաժարվել է զինաթափվել՝ առանց պաղեստինյան պետության ստեղծման:
Այս իրադարձությունների ֆոնին հրաժարական է տվել Նիդերլանդների արտգործնախարար Կասպար Վելդկամպը: Պատճառն այն է, որ նա չի կարողացել ստանալ նախարարների կաբինետի աջակցությունը Գազայում պատերազմի պատճառով Իսրայելի դեմ լրացուցիչ պատժամիջոցներ սահմանելու համար: Նրա հետ հրաժարական են տվել նաև նրա կուսակից նախարարները և պետքարտուղարները:
