Հայ-ամերիկյան ընկերությունը ոչ թե վերահսկելու, այլ կառավարելու է ճանապարհը, այսինքն՝ բիզնես կառավարում է իրականացնելու. Փաշինյան
Այդ մասին Կառավարության ճեպազրույցի ժամանակ ասաց ՀՀ վարչապետ Նիկոլ Փաշինյանը:
Փորձագիտական մակարդակում շեշտադրում կա, որ եթե լինի երկաթուղի, արդյոք իրանական բեռնատարները կարո՞ղ են այդ ճանապարհը հատել-անցնել: Այս համատեքստում Փաշինյանը նշեց ՀՀ մնացած հատվածներում ՌԴ-ի կողմից կոնցեսիայի սկզբունքով կառավարվող երկաթուղու օրինակը:
«Մեր բազմաթիվ բնակավայրերով և ճանապարհներով երկաթուղին անցնում է, տասնյակ, եթե ոչ հարյուրավոր տեղերով հատման կետեր կան: Որևէ հայկական, իրանական, վրացական, եվրոպական ավտոմեքենա այդ երկաթուղու վրայով անցնելիս որևէ խնդրի երբևէ հանդիպո՞ւմ է: Ո՛չ, որովհետև դա ՀՀ իրավազորության տարածք է»,- ասաց նա:
Փաշինյանն ուշադրություն հրավիրեց նաև Վաշինգտոնյան փաստաթղթում ներառված փոխադարձության սկզբունքի վրա, որ փոխադարձ առավելությունների մասին է:
«Մենք երբեք, իմիջիայլոց, չենք ասել, որ պատրաստվում ենք խոչընդոտ հարուցել Ադրբեջանի հիմնական մասի և Նախիջևանի Ինքնավար Հանրապետության միջև հաղորդակցության համար, և Վաշինգտոնի հռչակագրում ասված է Ադրբեջանի այդ առավելությունը, այսինքն՝ կապ ունենալու առավելությունն ընդգծված է վերը նշված սկզբունքների շրջանակում, և ընդգծված են ՀՀ-ի համար ներքին, այսինքն՝ երկրից երկիր, և միջազգային՝ այսինքն՝ դեպի երրորդ երկիր փոխադարձ առավելությունները»,- ասաց նա:
